तनावग्रस्त खेलमा भारतलाई टाइब्रेकरमा हराउँदै नेपाल फाइनलमा

साफ महिला च्याम्पियनसिपको ५ पटकको च्याम्पियन भारतलाई टाइब्रेकरमा हराउँदै नेपाल फाइनलमा पुगेको छ ।

खेलको ७१ औं मिनेटमा भारतले अग्रता लिएपछि नेपालले लगत्तै गोल फर्काए पनि रेफ्रीले त्यसलाई मान्यता नदिएपछि खेल एक घण्टाभन्दा धेरै समयसम्म रोकिएको थियो । त्यसपछि रेफ्री, म्याच कमिस्नर लगायतले छलफल गरेपछि खेल शुरू भएको हो ।

खेल निकै तनावग्रस्त बन्यो,विवाद समाधानपछि खेल सुरु भएको दोस्रो मिनेटमै नेपालबाट सावित्रा भण्डारीले गोल गरेकी थिइन् ।  यसअघि निर्धारित ९० मिनेटको खेलमा १-१ गोलको बराबरी भएको थियो ।

नेपालले भारतलाई पेनाल्टी सुटआउटमा ४–२ ले हराएको हो । अब उपाधिका लागि बंगलादेशसँग प्रतिस्पर्धा गर्नेछ । आइतबार नै बंगलादेशले भुटानलाई ७-१ ले हराउँदै फाइनल प्रवेश गरेको थियो । फाइनल खेल बुधबार हुनेछ ।