कृषिमन्त्री अधिकारी संग मेक्सिको कृषिमन्त्री भेटवार्ता,नेपालको कृषि र ब्यापारीक सुनिश्चित गर्न आग्रह

०८१,कात्तिक २७,मंगलबार,

कृषि तथा पशुपन्छीमन्त्री रामनाथ अधिकारी र मेक्सिको सरकारका कृषि तथा ग्रामीण विकास सचिवालय (मन्त्रालय) का मन्त्री जुलियो बर्डेगा बिच भेटवार्ता भएको छ ।

सिमिटका महानिर्देशकको निमन्त्रणामा सिमिटका क्रियाकलाप अवलोकन गर्न र सिमिट र नेपाल सरकारबीच दिगो रुपमा मकै र गहुँमा आधारित बाली प्रणाली सुधार गर्न सम्भावित सहकार्यबारे छलफल गर्ने उद्देश्यका साथ नेपाली प्रतिनिधिमण्डल सहित मेक्सिकोमा रहनु भएका मन्त्री अधिकारी र मेक्सिकोका मन्त्री विचको भेटमा मन्त्री अधिकारीले सन् १९७५ नोभेम्बर २५ मा नेपाल र मेक्सिकोबीच द्विपक्षीय सम्बन्ध स्थापना भएदेखि नै दुई देशबीचको सम्बन्ध सुमधुर र मैत्रीपूर्ण रहेको उल्लेख गर्नुभयो ।

दुई देशबीचको चार दशक लामो सम्बन्ध द्विपक्षीय र बहुपक्षीय मन्चहरुमा विश्वास, समझदारी र सहयोगद्वारा प्रतिविम्बित भएको छ भन्दै मन्त्री अधिकारीले नेपाल सरकारले गहुँ र मकै जस्ता आधारभूत खाद्यान्नमा देशलाई आत्मनिर्भर बनाउने र औद्योगिक आवश्यकताका लागि यस्ता उत्पादनको माग पूरा गर्ने तर्फ काम गरिरहेको बताउदै नेपाल सरकारद्वारा घोषणा गरिएको “कृषिमा लगानी दशक” को घोषणा गरेको र यसका लागी द्विपक्षीय सहयोगलगायत विभिन्न क्षेत्रबाट समग्र कृषि विकासमा लगानी खोजी गरीरहेको जानकारी गराउनुभयो । भेटमा मन्त्री अधिकारीले नेपाल सरकारको तर्फबाट मेक्सिको सरकारलाई मेक्सिकोका पर्यटकका लागि नेपाललाई प्राथमिकताको भ्रमण गन्तव्यका रूपमा लिन र नेपाली कृषि उत्पादन तथा अन्य व्यापारिक वस्तुमा प्राथमिकताका साथ बजार पहुँच उपलब्ध गराउन समेत अनुरोध गर्नुभयो ।

मन्त्री अधिकारी र सिमिटका महानिर्देशक डा ब्राम गोभाएर्ट्स बिच पनि भेट्वार्ता भएको छ । भेटमा मन्त्री अधिकारीले नेपालमा मकै र गहुँको उत्पादकत्व बढाउन सिमिट को भूमिका निर्णायक रहेको र आगामी दिनमा पनि नेपाल सरकारसँग संयुक्त रूपमा परियोजना प्रस्ताव विकास गर्न, गतिविधि सुरु गर्न आग्रह गर्नुभयो ।

सन् १९८५ बाट नेपाल सरकार र सिमिट विच औपचारिक साझेदारी भएता पनि सन् १९६० देखि नै सहकार्य भैआएको छ। सिमिटबाट विकसित गहुँको नयाँ जातको प्रयोगबाट नेपाल पनि हरितक्रान्तिमा समाहित भएको थियो। समन्वयात्मक अनुसन्धानका प्रयासहरूले नेपालको तराई क्षेत्र र पहाडहरूमा मकै र गहुँको उत्पादकत्वलाई उल्लेखनीय रूपमा बढाएको छ ।