धादिङमा पालिका स्तरीय भलिबल प्रतियोगिता पुरुष तर्फ खनियावासको सिङ्गङ एकता र महिलातर्फ नीलकण्ठ प्रथम

जिल्ला भलिबल संघ धादिङले धादिङ जिल्ला भलिबल टिमका पूर्व कप्तान स्व.मनोज श्रेष्ठको स्मृतिमा आयोजना गरेको महिला/पुरुष भलिबल प्रतियोगिता अन्तरगत पुरुष तर्फ खनियावास गाउँपालिकाको सिङ्गङ एकता समाज प्रथम भएको छ ।

मंसिर ८ गतेदेखी सुरु भएको प्रतियोगितामा पुरुष तर्फ ११ टिम र महिलातर्फ ८ टिम सहभागी थिए ।

सदरमुकाम धादिङबेशीस्थित कभर्डहल सँगैको खेलमैदानमा आईतबार भएको फाईनल खेलमा रुवीभ्याली गाउँपालिकालाई ३–० को सोझो सेटमा हराउदै खनियाबास गाउँपालिकाको सिङ्गङ एकता समाज प्रथम भएको हो । २५–२०, २५–२१ र २५–२० को सेटमा सिङ्गङ एकता समाजले खेल जितेको हो । क्वाटरफाइनल खेलमा खनियाबास गाउँपालिकाको टिमलाई नै पराजित गर्दै सिङ्गङ एकता सेमिफाइनल गएको थियो । सेमिफाइनल खेलमा सिङ्गङ एकताले गंगाजमुना गाउँपालिकालाई र रुवीभ्याली गाउँपालिकाले सिद्धलेक गाउँपालिकाको टिमलाई हराएर फाइनलमा पुगेका थिए ।

प्रथम भएकोे सिङ्गङले नगद १ लाख १ हजार १११ सहित ट्रफि,मेडल र प्रमाणपत्र, दोस्रो भएको रुवीभ्यालीले नगद ५५ हजार ५५५ र सेमिफाइनल पुगेका रुवीभ्याली र सिद्धलेकले २०/२० हजारसहित ट्रफि,मेडल र प्रमाणपत्र पाएका छन् ।

महिला तर्फ नीलकण्ठ नगरपालिका प्रथम भएको छ । शनिबार भएको फाईनल खेलमा सिद्धलेक गाउँपालिकालाई पराजित गर्दै नीलकण्ठ प्रथम भएको हो । सेमिफाइनलमा नीलकण्ठले ज्वालामुखी गाउँपालिकालाई र सिद्धलेक गाउँपालिकाले बेनिघाट रोराङ गाउँपालिकाको टिमलाई हराएर फाइनलमा पुगेका थिए ।

महिला तर्फ प्रथम भएकोे नीलकण्ठले नगद ५५ हजार ५५५ सहित ट्रफि,मेडल र प्रमाणपत्र, दोस्रो भएको सिद्धलेकले नगद ३० हजार ३३० र सेमिफाइनलमा पुगेका ज्वालामुखी बेनिघाट रोराङले १५/१५ हजार सहित ट्रफि,मेडल र प्रमाणपत्र पाएका छन्।

गंगाजमुना गाउँपालिका–४,गुम्दी घर भएका धादिङ भलिबल टिमका कप्तान श्रेष्ठको ०८० कात्तिक ९ गते निधन भएको थियो । टिपटप हेल्प नेपालबाट प्रधानमन्त्री कप एनभीए समेत खेलेका श्रेष्ठको कप्तानीमा धादिङले बागमती प्रदेश स्तरिय प्रतियोगिता समेत जितेको थियो ।

यस प्रतियोगिताबाट महिला/पुरुष दुबै तर्फ खेलाडी छनौट गरी जिल्ला स्तरिय टिम निर्माण गरिने उहाँको भनाई छ।