भोटेकोशी नदीमा २०८३ भदौ १० गते आएको विनाशकारी बाढीले गजुरी गाउँपालिका–५, गलौदीका अधिकांश घर डुबाएपछि स्थानीयहरू अहिले जंगलमा आश्रय लिन बाध्य भएका छन् ।

बाढीका कारण घरमा बस्न सक्ने अवस्था नरहेपछि गलौदी माथिको वन सवडिभिजन क्षेत्रको जंगलमा त्रिपाल र टेन्ट टाँगेर अस्थायी ‘होल्डिङ सेन्टर’ निर्माण गरिएको छ ।  प्रभावितका अनुसार उक्त होल्डिङ सेन्टरमा ४२ परिवारका कम्तीमा २ सय जना बसिरहेका छन् । यसैबीच, नेपाल तरुण दल त्रिपुरासुन्दरी गाउँपालिकाले भोटेकोशी बाढीबाट प्रभावित परिवारका लागि २०० थान पानीका जार वितरण गरेको छ ।  गल्छी र गजुरी गाउँपालिकामा रहेका विभिन्न होल्डिङ सेन्टरमा पानीका जार वितरण गरिएको हो ।

तरुण दलका युवाहरूले गलौदीस्थित होल्डिङ सेन्टरमा अस्थायी शौचालय निर्माणका लागि श्रमदानसमेत गरेका छन् ।  बाढीपछि खानेपानी र सरसफाइको समस्या झेलिरहेका प्रभावित परिवारलाई केही राहत पुगोस् भन्ने उद्देश्यले सहयोग गरिएको नेपाल तरुण दल त्रिपुरासुन्दरी गाउँपालिका सचिव दिलिप श्रेष्ठले ओखर न्यूजलाई जनकारी दिनुभयो  ।

‘सहयोग ठूलो नहोला, तर पीडामा रहेका परिवारको अनुहारमा क्षणभर भए पनि राहतको अनुभूति ल्याउन सकियो भने हाम्रो प्रयास सार्थक हुनेछ,’ नेपाल तरुण दल त्रिपुरासुन्दरी गाउँपालिका सचिव श्रेष्ठले बताए ।

उनीहरूले आगामी दिनमा पनि बाढी प्रभावितको आवश्यकताअनुसार सहयोगी हातहरू निरन्तर अघि बढाउने प्रतिबद्धता व्यक्त गरेका छन् ।