धादिङ जिल्लाकै प्रसिद्ध धार्मिक शक्तिपीठ श्री भगवती त्रिपुरासुन्दरी माईको भव्य मेला तथा सल्यानबेँसी जात्राको अवसर पारेर धादिङमा चौथो त्रिपुरासुन्दरी गोल्ड कप–२०८३ आयोजना हुने भएको छ ।

गणेशस्थान युवा क्लब (GYC) को आयोजनामा सञ्चालन हुने खुला ७ ए साइड फुटबल प्रतियोगिता आगामी मंसिर १९ गतेदेखि त्रिपुरासुन्दरी गाउँपालिका–६, गणेशस्थानस्थित सल्यानबेँसीमा सुरु हुनेछ ।  प्रतियोगिता मंसिर २४ गतेसम्म सञ्चालन हुने र हरेक वर्ष धार्मिक तथा सांस्कृतिक महत्वका साथ मनाइने सल्यानबेँसी जात्रा मंसिर २३ गते सल्यानकोट र मंसिर २४ गते सल्यानबेँसीमा आयोजना हुँदैछ ।  यही अवसरमा खेलकुदको माध्यमबाट युवाबीच आपसी सद्भाव, एकता र खेल भावना विकास गर्ने उद्देश्यले गोल्ड कप आयोजना गर्न लागिएको गणेशस्थान युवा क्लबका सदस्य विशाल खड्काले ओखर न्यूज डट कम लाई जानकारी दिनुभयो ।

प्रतियोगितामा सहभागी हुन इच्छुक टिमले ६ हजार ६६६ रुपैयाँ दर्ता शुल्क बुझाउनुपर्नेछ ।  प्रत्येक टिममा ७ जना खेलाडीसहित ३ जना अतिरिक्त खेलाडी गरी जम्मा १० जना खेलाडी रहने व्यवस्था गरिएको छ ।  त्यस्तै, प्रत्येक टिममा एक जना कोच अनिवार्य छ,प्रतियोगिताको विजेता टिमले नगद ७७ हजार ७७७ रुपैयाँसहित ट्रफी, मेडल र प्रमाणपत्र प्राप्त गर्नेछ भने उपविजेता टिमले ३८ हजार ३३३ रुपैयाँसहित ट्रफी, मेडल र प्रमाणपत्र पाउनेछ । त्यसैगरी प्रतियोगितामा उत्कृष्ट प्रदर्शन गर्ने खेलाडीहरूलाई पनि आकर्षक पुरस्कारको व्यवस्था गरिएको छ । उच्च गोलकर्तालाई ४ हजार ४४४ रुपैयाँसहित ट्रफी, उत्कृष्ट खेलाडीलाई ४ हजार ४४४ रुपैयाँसहित ट्रफी तथा उत्कृष्ट गोलरक्षकलाई पनि ४ हजार ४४४ रुपैयाँसहित ट्रफी प्रदान गरिनेछ । प्रतियोगिता मंसिर १९ गते बिहान ११ बजेदेखि सुरु हुनेछ,प्रतियोगिता निकै प्रतिस्पर्धात्मक र रोमाञ्चक हुने खड्काले बताउनुभयो ।

आयोजक गणेशस्थान युवा क्लबले धार्मिक, सांस्कृतिक तथा खेलकुद गतिविधिलाई एकसाथ जोड्दै आयोजना गर्न लागिएको प्रतियोगितामा सम्पूर्ण फुटबलप्रेमी, खेलाडी, भक्तजन तथा शुभचिन्तकहरूलाई उपस्थितिका लागि हार्दिक निमन्त्रणा गरेको छ ।