भोटेकोशी नदीमा आएको विनाशकारी बाढीबाट प्रभावित परिवारको राहत तथा सहयोगका लागि नेपाल तरुण दल गाउँपालिकाले खाद्यान्न सामग्री वितरण गरेको छ ।

बाढीका कारण घरबारविहीन तथा विस्थापित भएर आश्रयस्थलमा बसिरहेका गजुरी गाउँपालिका–५, पोखरेखोलाका बाढी प्रभावित परिवारलाई तरुण दलका नेता मनोज कडेलको पहलमा रु. १ लाख ५३ हजार ९ सय बराबरको खाद्यान्न सामग्री सहयोग गरेको हो । तरुण दल त्रिपुरासुन्दरी गाउँपालिकाको टोली पोखरेखोला होल्डिङ सेन्टरमै पुगेर प्रभावित परिवारलाई खाद्यान्न सामग्री वितरण गरेको जनाएको छ । भोटेकोशी बाढीका कारण घर, सम्पत्ति तथा दैनिक जीवनयापनका आधार गुमाएका परिवार अहिले अस्थायी आश्रयस्थलमा बस्न बाध्य छन् । यस्तो अवस्थामा खाद्यान्नलगायत आधारभूत आवश्यकताका सामग्रीको अभाव हुन नदिन विभिन्न व्यक्ति तथा संघसंस्थाबाट सहयोग जुट्ने क्रम जारी छ । तरुण दलले विपत्तिको समयमा पीडित परिवारलाई केही राहत र भरोसा मिलोस् भन्ने उद्देश्यले विपत्तिले मानिसको घर मात्रै नभई वर्षौँदेखि जोडिएका सपना, भरोसा र आफन्तसमेत खोस्ने अवस्था सिर्जना गरेको भन्दै दुःखमा परेका नागरिकलाई आफ्नो परिवार सम्झेर सहयोग गर्नुपर्नेमा जोड दिइएको छ । 

सहयोगलाई ठूलो दानका रूपमा नभई संकटमा परेका आफ्नै नागरिकप्रतिको सानो साथका रूपमा लिइएको तरुण दलको भनाइ छ। तत्कालको आवश्यकता पूरा गर्न खाद्यान्न सहयोग गरिएको र आगामी दिनमा पनि जहाँ आवश्यकता देखिन्छ, त्यहाँ आफ्नो क्षमताअनुसार सहयोग लिएर पुग्नेका नेपाल तरुण दल त्रिपुरासुन्दरी गाउँपालिका तरुण दलका अध्यक्ष रोजन पाण्डेले बताउनु भयो । 

भोटेकोशी बाढीपछि धादिङका विभिन्न नदी किनार तथा जोखिमयुक्त क्षेत्रमा ठूलो जनधनको क्षति भएको छ । धेरै परिवार विस्थापित भएका छन् भने कतिपय परिवार अझै अस्थायी होल्डिङ सेन्टर तथा आफन्तको आश्रयमा बसिरहेका छन् ।  यस्तो अवस्थामा सरकारी निकायसँगै राजनीतिक दल, सामाजिक संस्था, युवा समूह तथा व्यक्तिगत रूपमा सहयोग गर्नेहरूको भूमिका पनि महत्वपूर्ण बन्दै गएको छ ।