भदौ १० गते भोटेकोशीसहित त्रिशूली नदीमा आएको अकल्पनीय बाढीले धादिङको मलेखुस्थित फुर्केखोलाको पक्की पुल बगाएको आज २०औँ दिन पुगेको छ । पुल बगेपछि धादिङबेँसी र पृथ्वीराजमार्गबीचको मुख्य सडक सम्पर्क टुटेको छ ।

सदरमुकामबाट बाहिरिने र बाहिरी क्षेत्रबाट धादिङबेँसी भित्रिने यातायातका लागि यो पुल अत्यन्त महत्वपूर्ण मार्गका रूपमा रहँदै आएको थियो । धादिङको सदरमुकाम धादिङबेँसीलाई पृथ्वीराजमार्गसँग जोड्ने प्रमुख सडक संरचनामध्ये एक रहेको फुर्केखोला पुल बाढीले बगाएपछि जिल्लाको उत्तरी तथा मध्य क्षेत्रको नियमित यातायात प्रभावित भएको छ ।  पुल सञ्चालनमा रहँदा यसमार्फत दैनिक करिब २०० यात्रुबाहक, १५० मालवाहक तथा ३०० हाराहारीमा साना र दुईपाङ्ग्रे सवारीसाधन आवतजावत गर्ने गरेका थिए । यो सडक धादिङका आठ स्थानीय तह, गोरखाका दुई स्थानीय तह तथा मनास्लु पर्यटन पदमार्गसँग प्रत्यक्ष जोडिएको महत्वपूर्ण यातायात मार्ग हो ।  यसबाट दुई लाखभन्दा बढी जनसङ्ख्या प्रत्यक्ष रूपमा प्रभावित हुने भएकाले पुलको महत्व धादिङबेँसी आसपासमा मात्र सीमित छैन । पुल बगेपछि सिद्धलेक, ज्वालामुखी, त्रिपुरासुन्दरी, नेत्रावती डबजोङ, गंगाजमुना, खनियाबास, रुबीभ्याली र नीलकण्ठ क्षेत्रबाट सदरमुकाम तथा पृथ्वीराजमार्गतर्फ हुने आवतजावतमा समेत कठिनाइ थपिएको छ । 

बाढी आएको २० दिन बितिसक्दा पनि नदीमा नयाँ पक्की पुल वा बेलिब्रिज निर्माण हुन नसक्दा स्थानीय नागरिकले वैकल्पिक बाटो प्रयोग गर्नुपर्ने बाध्यता छ । यसले यात्राको समय र खर्च बढाउनुका साथै दैनिक उपभोग्य सामग्रीको ढुवानीदेखि व्यापार व्यवसायसम्म असर पुर्‍याएको धादिङ उद्योग वाणिज्य संघका अध्यक्ष रामकुमार डल्लाकोटीले बताउनु भयाे । "विशेषगरी नजिकिँदै गरेका चाडपर्वका समयमा आवतजावत तथा उपभोग्य वस्तुको आपूर्ति सहज बनाउन तत्काल वैकल्पिक संरचना निर्माण गर्नुपर्ने आवश्यकता देखिएको छ ।"  आपत्कालीन सेवा, बिरामीको उपचार, विद्यार्थीको आवतजावत तथा दैनिक कामकाजका लागि समेत सहज सडक सम्पर्क आवश्यक रहेको अध्यक्ष डल्लाकोटीले जोड दिनुभयो ।

फुर्केखोला पुल धादिङबेँसीलाई पृथ्वीराजमार्गसँग जोड्ने एउटा सामान्य पूर्वाधार मात्र नभई जिल्लाको आर्थिक, प्रशासनिक र सामाजिक जीवनसँग प्रत्यक्ष जोडिएको संरचना भएकाले यसको पुनर्निर्माणलाई प्राथमिकतामा राख्नुपर्ने माग बढ्दै गएको छ ।

स्थानीयले नयाँ पुल निर्माण वा तत्कालका लागि बेलिब्रिज जडान गरी यातायात सञ्चालन सहज बनाउन सम्बन्धित निकायसँग आग्रह गरेका छन् । पुल पुनर्निर्माणको विषय कुनै राजनीतिक स्वार्थभन्दा माथि उठेर नागरिकको सहज आवागमन, आपूर्ति व्यवस्था र स्थानीय अर्थतन्त्रसँग जोडिएको साझा सवालका रूपमा अघि बढाउन आवश्यक छ ।

बाढीले पुल बगाएको २० दिन बितिसक्दा पनि मुख्य सडक सम्पर्क सहज हुन नसक्नुले अब विकल्प खोज्ने मात्र नभई स्थायी समाधानतर्फ तत्काल काम अघि बढाउनुपर्ने आवश्यकता देखिएको छ ।