नेपाली कांग्रेसको १५औँ महाधिवेशनअन्तर्गत धादिङ प्रतिनिधिसभा क्षेत्र नं. २, प्रदेश सभा (क) बाट युवा सदस्य पदमा अनिल श्रेष्ठ निर्विरोध निर्वाचित हुनुभएको छ ।

नीलकण्ठ नगरपालिका–९, पाल्पाबाट राजनीतिक यात्रा सुरु गर्नुभएका श्रेष्ठ विद्यार्थी राजनीतिदेखि नै संगठन र सामाजिक सरोकारका विषयमा सक्रिय रहँदै आउनुभएको छ ।  नेपाल विद्यार्थी संघको नीलकण्ठ इकाइ सदस्य हुँदै इकाइ अध्यक्षको दुई वर्षे जिम्मेवारीसमेत सफलतापूर्वक पूरा गरेपछि उहाँ पार्टी राजनीतिमा थप सक्रिय हुनुभएको हो ।

विद्यार्थी जीवनदेखि नै संगठन निर्माण, नेतृत्व विकास र युवाका सवालमा सक्रिय श्रेष्ठले पार्टी संगठनमा युवाको अर्थपूर्ण सहभागिता सुनिश्चित गर्नुपर्नेमा जोड दिँदै आउनुभएको छ । अग्रजको अनुभवलाई सम्मान गर्दै युवाको ऊर्जा, नयाँ सोच र पुस्तान्तरणलाई संगठनसँग जोड्ने उहाँको लक्ष्य छ ।  साथै, युवाका सवाललाई पार्टीभित्र प्रभावकारी रूपमा उठाउँदै जनतासँगको सम्बन्धलाई अझ मजबुत बनाउने प्रतिबद्धता श्रेष्ठले व्यक्त गर्नुभएको छ ।

विद्यार्थी संगठनको जिम्मेवारीबाट सुरु भएको श्रेष्ठको राजनीतिक यात्रा अहिले पार्टी संगठनको भूमिकासम्म आइपुगेको छ ।  आगामी दिनमा युवाको आवाजलाई निर्णय प्रक्रियासम्म पुर्‍याउँदै संगठन निर्माणमा सक्रिय भूमिका निर्वाह गर्ने उहाँले ओखर न्यूजलाई बताउनु भयो । 

“युवाको सहभागिता, पुस्तान्तरण र नयाँ नेतृत्वको खोजी” लाई आफ्नो राजनीतिक यात्राको मूल आधार बनाउँदै श्रेष्ठले पार्टीभित्र युवाको भूमिका थप प्रभावकारी बनाउन पहल गर्ने बताउनुभएको छ ।