भारतको ओडिसा राज्यको कटक शहरस्थित एससीबी अस्पतालको आईसीयू वार्डमा आगलागी हुँदा कम्तीमा १० जना बिरामीहरूको ज्यान गएको छ ।

ओडिसाका मुख्यमन्त्री मोहन चरण माझीलाई उद्धृत गर्दै भारतीय सञ्चार माध्यमहरूले जनाएअनुसार ट्रामा आईसीयूमा विद्युत् सर्ट (शर्ट सर्किट) भएका कारण आगलागी भएको हो । घटनाको समयमा उक्त वार्डमा २३ जना बिरामी उपचाररत रहेका थिए। आगलागीपछि अन्य बिरामीहरूलाई तत्कालै सुरक्षित स्थानमा सारिएको अस्पताल प्रशासनले जनाएको छ ।

बिरामीहरूको उद्धार तथा नियन्त्रण प्रयासका क्रममा कम्तीमा ११ जना स्वास्थ्यकर्मी घाइते भएका छन्, जसमा केहीको अवस्था गम्भीर रहेको बताइएको छ ।

यस घटनाप्रति भारतका प्रधानमन्त्री नरेन्द्र मोदीले दुःख व्यक्त गर्दै सामाजिक सञ्जालमार्फत पीडित परिवारप्रति समवेदना प्रकट गर्नुभएको छ। साथै, मृतकका परिवारलाई क्षतिपूर्तिको घोषणा पनि गरिएको छ ।

अस्पतालजस्ता संवेदनशील स्थानमा बारम्बार हुने यस्ता घटनाले सुरक्षा व्यवस्थाप्रति गम्भीर प्रश्न उठाएको छ ।