धादिङको गजुरी गाउँपालिकामा मोटरसाइकल चोरीसम्बन्धी कसुरमा संलग्न रहेको आरोपमा प्रहरीले दुई युवकलाई पक्राउ गरेको छ ।  पक्राउ पर्नेमा गजुरी गाउँपालिका–८ मजुवा बस्ने १८ वर्षीय बुद्धि बमकाजी भन्ने सागर तामाङ र सोही गाउँपालिकाको सिउरेनी बस्ने २२ वर्षीय शिशिर तामाङ रहेका छन् ।

गोप्य सूचनाका आधारमा इलाका प्रहरी कार्यालय गजुरी र अस्थायी प्रहरी पोष्ट आदमघाटबाट खटिएको प्रहरी टोलीले उनीहरूकै घर ठेगानामा गोप्य रूपमा खोजतलास गर्ने क्रममा दुवै जनालाई पक्राउ गरेको हो । प्रहरीका अनुसार थप अनुसन्धानका क्रममा शिशिर तामाङविरुद्ध प्रहरी वृत्त कालिमाटी र थानकोट काठमाडौंमा चोरीसम्बन्धी मुद्दा दर्ता भई उनी फरार रहेको खुलेको छ । त्यस्तै, सागर तामाङविरुद्ध पनि प्रहरी वृत्त थानकोटमा चोरीसम्बन्धी मुद्दा दर्ता भएको पाइएको प्रहरीले जनाएको छ । प्रारम्भिक अनुसन्धानबाट पक्राउ परेका दुवै जना यसअघि पनि चोरीसम्बन्धी कसुरमा संलग्न रहेको खुलेको प्रहरीले जनाएको छ ।

पक्राउ परेका सागर तामाङको साथबाट सवारी दर्ता किताब नभएको बा.प्र.०२-०६७ प ७८१३ नम्बरको कालो निलो रङको २२० सीसीको पल्सर मोटरसाइकल र अवैध भरुवा जस्तो देखिने एक थान बन्दुकसमेत बरामद गरिएको छ । प्रहरीले बरामद मोटरसाइकल र बन्दुक नियन्त्रणमा लिएको जनाएको छ ।  पक्राउ परेका शिशिर तामाङलाई चोरीसम्बन्धी कसुरमा थप अनुसन्धान तथा कारबाहीका लागि प्रहरी वृत्त थानकोट काठमाडौं पठाइएको छ ।

त्यस्तै, सागर तामाङमाथि हातहतियार तथा खरखजाना ऐन, २०१९ बमोजिमको कसुरमा इलाका प्रहरी कार्यालय गजुरी धादिङबाट थप अनुसन्धान भइरहेको प्रहरीले जनाएको छ ।