शहरी क्षेत्रलाई व्यवस्थापन गर्न नीलकण्ठ नगरपालिकाले मेट्रिक ठेगाना प्रणाली (मेट्रिक एड्रेसिङ सिस्टम) को सुरुवात गरेको छ । 

नीलकण्ठ नगरपालिका क्षेत्रमा रहेका १६ हजार ३ सय ९१ घरधुरीमध्ये पहिलो चरणमा ३ हजार ८५० घरधुरीमा उक्त प्रणाली राख्ने कार्य सुरु गरिएको छ । पहिलो चरणमा नगरपालिकाको ३,४,८ र १२ मा यो कार्यक्रमको निजी घरमा नम्बर प्लेट लगाएर प्रणालीको सुरुवात गरेको छ,विस्तारै १४ वटै वडामा विस्तार गरिने छ ।

हाउस नम्बरिङ र रोड इन्फरमेसन बोर्ड सिस्टम मेट्रिक मापन एकाइमा आधारित भएकाले वैज्ञानिक छ उनले भने, यस प्रणालीअन्तर्गत सडक पहिचान गरेर सडकको सुरु बिन्दुबाट नाप गरी कति मिटरमा घरको दैलो पर्ने हो सोहीअनुसार नै घर नम्बर दिइन्छ । यसमा दायाँ–बायाँ क्रमशः जोर-विजोर नम्बर दिने गरिन्छ । बाटोको आमुन्ने-सामुन्ने वा दुईतर्फ पर्ने घर बराबर दूरीमा भए दायाँतिर जोर नम्बर र बायाँतिर बिजोर नम्बर दिइने गरेको पूर्व सल्लाहकार दिपक कोइरालाले ओखर न्यूज डट कमलाई जानकारी दिए ।

प्रविधिको विकाससँगै सबै सेवाहरू आधुनिक हुँदै गएकाले यस प्रणालीलाई प्रविधिसँंग जोडेर नगरवासीलाई सहजरूपमा सेवा उपलब्ध गराउने उद्देश्यले कार्य अगाडि बढाइएको र आपतकालीन अवस्थामा पनि घर नम्बरबाट तुरुन्तै घरको पहिचान हुने हुँदा दमकल,एम्बुलेन्स,टेलिफोन,विद्युत, खानेपानीलगायत सेवा दिनसमेत यस प्रणालीले सहयोग गर्छ,प्रहरीलाई आवश्यक पर्दा व्यक्तिको घरमा पुग्न सजिलो हुन्छ । यो प्रणाली जडान भएका घरघुरी र सडकको डिजिटल नक्सा तयार गरी राखिने भएकाले गुगल म्यापका आधारमा घर पहिचान गर्न सकिने नीलकण्ठ नगरपालिकाका नगर प्रमुख भीमप्रसाद ढुँगाना​ले बताए । ​​​​​​ 

नीलकण्ठ नगरपालिका आधुनिक, व्यवस्थित र स्मार्ट सिटीतर्फ अघि बढ्ने लक्ष्यमा एक कदम अगाडि बढेको छ ।