स्थानीयले फेरि नागढुंगा सुरूङ मार्गको काम अवरोध गरेका हुन् । 

आइतबारदेखि धादिङ र काठमाडौं दुवैतर्फको काम ठप्प छ,आयोजना यसअघि पाँचपटक अवरोध भइसकेको छ । चन्द्रागिरी नगरपालिका–२ का  पूर्ववडाध्यक्ष गोपी सुर्खेतीको नेतृत्वमा चार दिनदेखि सुरूङ मार्गको काम ठप्प परिएको हो ।  निर्माणको अन्तिम चरणमा आइपुग्दा आयोजनासँग निःशुल्क खानेपानी उपलब्ध हुनुपर्ने उनीहरूको माग छ । खानेपानीको जिम्मा महानगर लिन्छु भनेको छ । तर, मौखिक रूपमा लिन्छु भनेर हुन्न, त्यसको लिखित प्रतिवद्धता पनि चाहिन्छ,सुर्खेतीले भने,घर चर्किएका सबैले क्षतिपूर्ति पनि पाएका छैनन् ।

आयोजनाले वार्ताका लागि आवह्वान गर्दा समेत अवरोधकर्ता नआएको आयोजनाले जनाएको छ । 

आयोजनाका सिनियर डिभिजन इन्जिनियर सञ्जय पन्थीका अनुसार, आइतबारदेखि काम ठप्प छ । एकदिन काम ठप्प हुँदा ५० लाखको हाराहारीमा क्षति हुने आयोजनाको भनाइ छ,सुरूङ ४२ महिनामा निर्माण सकिनुपर्ने थियो । तर, स्थानीयले स–साना कुरामा पनि अवरोध पुर्‍याउँदा निर्माण अवधि लम्बिइरहेको छ । आयोजनाको काम असोजसम्म सक्ने गरी तयारी थियो । तर, पटक–पटक अवरोध हुँदा समयमै सकिन गाह्रोपर्ने पन्थी बताउँछन् । 

सुरूङ मार्ग ०७६ कात्तिक ४ बाट निर्माण सुरू भएको थियो । ०८० वैशाखसम्म सम्पन्न गर्नुपर्ने सम्झौता थियो । तर, कोभिड तथा स्थानीयको अवरोधले म्याद थप भएको थियो । त्यसपछि ०८१ वैशाख १३ सम्म म्याद थपे पनि काम सकिएन । आयोजनासँग अब ०८२ असोजसम्म म्याद छ ।