प्रयत्नशील सामुदायिक विकास समाज (प्रयास) नेपालले गंगाजमुना गाउँपालिकामा सञ्चालन गरेको रिलिफ परियोजनाको सामाजिक लेखा परीक्षण तथा सार्वजनिक सुनुवाई र्कायक्रम सम्पन्न भएको छ । 

प्रयास नेपालका अध्यक्ष विरबहादुर श्रेष्ठको अध्यक्षतामा भएको कार्यक्रममा एक वर्षको अवधिमा गाउँपालिका भित्रका सबै वडामा रहेका ४८ ओटा कृषक समूहमा भए गरेका कामहरु र आर्थिक खर्च विवरणको सामाजिक लेखा परीक्षण गरिएको हो । सामाजिक लेखा परीक्षण तथा सार्वजनिक सुनुवाई र्कायक्रममा संस्थाको तर्फबाट प्रगति तथा आर्थिक प्रतिवेदन प्रस्तुत गरिएको थियो । वर्ष सन् २०२५ मा  गंगाजमुना गाउँपालिकामा सञ्चालित उत्थानशील जीविकोपार्जन तथा खाद्य सुरक्षा सुदृढिकरण (रिलिफ) परियोजनाको सामाजिक लेखा परीक्षण तथा सार्वजनिक सुनुवाई कार्यक्रम आज सम्पन्न भएको संस्थाका फिल्ड संयोजक पवन प्याकुरेलले जानकारी दिनुभयो । गंगाजमुना गाउँपालिकाका उपाध्यक्ष रामेश्वर सिम्खडा, सबै वडाका वडा अध्यक्षहरु, निमित्त प्रमुख प्रशासकीय अधिकृत बद्रिनाथ पौडेल, कृषि, पशुसेवा, महिला तथा बालबालिका, योजना लगायतका शाखा प्रमुखहरु, विभिन्न कृष समूहका प्रतिनिधिहरु, अगुवा किसानहरु र अन्य सरोकारवालाहरुको सहभागितामा भएको कार्यक्रममा नमूना बाख्रा खोर सुधार, प्राङ्गारिक कृषि, जलवायु अनुकुलन कृषि प्रणली, समूह व्यवस्थापन, समूहको लेखा अभिलेखिकरण, विभिन्न जातका बालीहरुको पाठशाला लगायतका विषयमा संस्थाले काम गरिरहेको पनि जानकारी गराइएको थियो । 

सामाजिक लेखा परीक्षण तथा सार्वजनिक सुनुवाई कार्यक्रममा सहभागि किसानहरुले परियोजनाले किसानहरुमा ल्याएको परिवर्तन, जलवायु अनुकूलन कृषि प्रणलीका फाइदाहरु, कृषि पाठशालाले सिकाइमा ल्याएको परिवर्तन, व्यवस्थित लेखा अभिलेखिकरण, अगुवा किसानले कृषक समूहमा दिएको सेवा, लैंगिक आधारमा हुने कार्यबोझको विश्लेषण लगायतका विषयमा जानकारी गराएका थिए । छलफलका क्रममा सहभागि किसानहरुले परियोजना ढिला शुरु भएको, तालिम तथा कार्यक्रम संख्या कम भएको र प्राविधिक सेवा समयमा नपाएको गुनासो गरेका थिए । त्यसैगरि वडाअध्यक्षहरुले पनि संस्था र वडाबिचको समन्वय विस्तार हुनुपर्ने गाउँपालिकाले बनाएको नीतिको परिधिमा रहेर कार्यक्रम सञ्चालन गर्नुपर्ने, शिक्षा क्ष्ेत्रको विकासमा पनि कार्यक्रम केन्द्रित गर्नुपर्ने लगायता सुझावहरु दिएका छन् । प्राप्त गुनासो तथा सुझावलाई सम्बोधन गर्ने क्रममा प्रयास नेपालका कार्यकारी निर्देशक दामोदर अर्यालले परियोजना गाउँपालिकासंगको सहकार्यमा सञ्चालन गर्ने, सम्पन्न कृयाकलाप र आगामी कार्यका बारेमा मासिक रुपमा वडामा प्रतिवेदन बुझाउने, कृषि तथा पशुसेवाका प्राविधिक र समुदाय सहजकर्तालाई कृषक समूहप्रति उत्तरदायी बनाउने लगायतका प्रतिवद्धता व्यक्त गर्नुभयो । 

रेडियो धादिङका स्टेशन म्यानेजर राजाराम शर्माले सहजीकरण गर्नुभएको कार्यक्रममा परियोजना शुरु भएयता ३९ लाख ३९ हजार एकसय अट्ठाइस रुपैयाँ खर्च भएको पनि सामाजिक लेखा परीक्षण तथा सार्वजनिक सुनुवाई कार्यक्रममा जानकारी गराइएको थियो ।