खनियाबास गाउँपालिका र हेफर इन्टरनेशनल नेपालको सहयोगमा सञ्चालित कृषि तथा पशु विकासमा आधारित साना किसान तथा युवा उद्यमशीलता कार्यक्रम अन्तर्गत आज उपहार प्रदान कार्यक्रम सम्पन्न भएको हाे।

उक्त कार्यक्रम स्थानीय समुदायको आर्थिक सशक्तीकरण तथा दिगो विकासलाई प्रोत्साहित गर्ने उद्देश्यले आयोजना गरिएको कार्यक्रम सञ्चालन गर्ने साझेदार संस्था ग्रामीण आपसि विकास (आर एम डि) का कार्यकारी संयाेजक शेरबहादुर भण्डारीले जानकारी दिनुभयाे । उपहार प्रदान कार्यक्रमका प्रमुख अतिथि पूर्व कानून, न्याय तथा संसदिय मामिला राज्य मन्त्री दिलमान पाख्रिनले उपहार हस्तान्तरण गर्दै यस कार्यक्रमले गरिबी निवारण, महिला सशक्तीकरण र कृषि व्यवसाय प्रवर्द्धनमा महत्वपूर्ण योगदान पुर्‍याइरहेको उल्लेख गर्नुभयो। उहाँले सहभागी कृषकहरूलाई सहयोगको सही सदुपयोग गर्न अनुरोध गर्दै भविष्यमा अझ सशक्त परिणाम प्राप्त गर्न सबै पक्षहरूको सहकार्य आवश्यक रहेको पनि बताउनुभयो ।

कार्यक्रममा अवसरमा २ सय ८१ कृषक परिवारलाई बाख्रा तथा ६२ कृषक परिवारलाई बाख्राकाे खाेर उपहार स्वरूप प्रति खाेर १५ हजार रुपैयाँ प्रदान गरिएको थियाे । लाभान्वित कृषकहरूले हेफर नेपालको सहयोगले आफ्नो आर्थिक अवस्था सुधार गर्न ठूलो टेवा पुग्ने विश्वास व्यक्त गरेका छन् ।कार्यक्रममा खनियाबास गाउँपालिकाका उपाध्यक्ष सेक्केमान तामाङ, सबै वडाका वडा अध्यक्षहरु, स्थानीय सरकारका प्रतिनिधि, सरोकारवालाहरू, हेफर नेपालका पदाधिकारी तथा स्थानीय कृषकहरूको उल्लेखनीय सहभागिता रहेको थियो। आयोजकहरूले आगामी दिनमा पनि यस्ता कार्यक्रमलाई निरन्तरता दिँदै सामुदायिक समृद्धि र आत्मनिर्भरता बढाउने लक्ष्य राखिएको बताएका छन् ।
कार्यक्रम अन्तरगत खनियाबासमा व्यावसायिक बाख्रा पालनसंगै प्लाष्टिक घरमा तरकारी खेति, अकबरे खुर्सानी खेती र जलवायु अनुकूलन कृषि प्रणालिका कामहरु भैरहेका छन् । २०७८ सालबाट शुरु भएकाे कार्यक्रम अहिले दाेश्राे चरणमा सञ्चालन भैरहेकाे पनि आर एम डि का कार्यकारी संयाेजक भण्डारीले बताउनु भयाे । कार्यक्रम सञ्चालनका लागि खनियाबास गाउँपालिकाले ७० प्रतिसत र हेफर परियाेजनाले ३० प्रतिशत लगानी गरेकाे छ । कार्यक्रम सञ्चालन अवधिदेखि हालसम्म गाउँपालिकाले २ कराेड ५५ लाख ६२ हजार ६ सय ५७ रुपैयाँ  बजेट खर्च गरिसकेकाे छ भने किसानहरुले कृषि तथ पशुजन्य वस्तु विक्रिबाट करिव ७ कराेड रुपैयाँ आम्दानी गरेकाे गाउँपालिकाकाे तथ्यांकमा उल्लेख गरिएकाेछ ।

पछिल्लाे सर्भेक्षण अनुसार २ हजार ९ सय घरधुरी रहेकाे गाउँपालिकामा याे कार्यक्रम २२ सय घरधुरीमा पुगिसकेकाेछ ।