धादिङको गजुरी गाउँपालिकाको वडा नम्बर ५ गलौंदी स्थित खेलमैदानमा ‘तेस्रो धादिङ रैथाने खाना तथा कृषि पर्यटन व्यापार महोत्सव-२०८१’ सञ्चालन भईरहेको छ ।

के साच्चिकै रैथाने खाना छ त ? तेस्रो धादिङ रैथाने खाना तथा कृषि पर्यटन व्यापार महोत्सब २०८१ मा ? महोत्सवमा कृषि तथा प्रविधि प्रदर्शनी स्टल व्यवस्थापनदेखि कृषि प्रदर्शनी, झाँकी व्यवस्थापन, सांस्कृतिक प्रस्तुति, महोत्सवमा रैथाने खानाका परिकारहरू, कृषि उत्पादन, घरेलु तथा हस्तकला प्रवर्द्धनका गतिविधिहरू, मनोरञ्जन पार्क, सस्तो बजार, र खाना पकाउने प्रतियोगिता गर्ने उद्देश्यले यही चैत १४ देखि २४ गतेसम्म रैथाने खाना तथा कृषि पर्यटन व्यापार महोत्सव सञ्चालन भईरहेको छ ।

जिल्ला होटल संघ धादिङको आयोजनामा भएको यो महोत्सवको संरक्षकमा गजुरी गाउँपालिका रहेको छ । नाम सुन्दा महोत्सव स्थल भित्र पक्कै पनि धादिङ जिल्लाका विभिन्न जाती समुदायका खानाका परिकार र जिल्ला भित्रको कृषि उत्पादन र वजारीकरणलाई टेवा पुग्ने प्रदर्शनीहरु राखिएको हुनुपर्छ भन्ने लाग्नु स्वभाविक हो ।

जिल्लाभरका होटल व्यवसायीहरुको छाता संगठनले महोत्सवको आयोजना गर्दा जिल्ला भित्रका कुनै होटल सहभागि नहुनु,रैथाने  खानाको प्रचार गरेर महोत्सवमा केही नभेटिनु लाजमर्दो अवस्था हो ।  महोत्सव स्थलमा न त कुनै स्थानीय खानाका परिकार देख्न पाईन्छ न त कृषि सम्वन्धी कुनै प्रदर्शनी । लाज मर्दो कुरा त के छ भने महोत्सव स्थलमा कृषिका नाममा एउटा मकैको बोट, एउटा लसुनको बोट र  बाल्टिनमा फलाईएको बन्दा  बाहेक त्यहाँ भित्र कृषिसंग सम्वन्धित कुनै सामाग्री प्रदर्शनीमा देख्न पाईदैन ।  एक सयको हाराहारीमा रहेका स्टलमा ८० भन्दा धेरै खाली देखिन्छन् । महोत्सवको नाममा न स्थानीय सहभागिता, न कुनै उत्साह, स्टेज वरिपरी २०÷२५ जना भन्दा बढी दर्शक देखिंदैनन, देखिएकामा पनि १० जना जति सुरक्षाकर्मीहरुनै छन ।

देशका अन्य स्थानमा जस्तै धादिङमा पनि महोत्सवका नाममा विकृति बढ्दै छ । महोत्सवका नाममा जुवा खेलाउनजे, मदिराको खुलेआम बिक्री वितरण गर्ने, छाडा गित नृत्य प्रस्तुत गर्ने कार्यले बढावा पाउने गरेको छ । अधिकांश मेला महोत्सवले लोक कला,संस्कृति, परम्परा,व्यापार, पर्यटन प्रवद्र्धन गर्ने आकर्षक नारा अघि सारेपनि भित्रि उद्धेश्य आयोजकले कमाउनु र रमाउनु मै सिमित हुने गरेको देखिन्छ ।

जिल्ला भित्र संचालित कुनै पनि महोत्सवले आर्थिक सम्बृद्धि र स्वरोजगारका आधार र कृषि र पर्यटन प्रवद्र्धनमा खासै योगदान दिन सकेका छैनन् ।