म्यानमारमा विनाशकारी भूकम्पपछि भौतिक संरचना भत्कँदा नेपाली मूलका म्यानमारी नागरिकको मृत्यु हुने संख्या १८ पुगेको छ ।

भूकम्पबाट बढी क्षति पुगेको मान्डले क्षेत्रमा ३०–३५ हजारको संख्यामा नेपाली मूलका म्यानमारी नागरिकको बसोबास रहेको र १८ जना गैरआवासीय नेपालीको मृत्यु भएको खबर प्राप्त भएको छ । गैरआवासीय नेपालीहरूको राहतका लागि संघको तर्फबाट एनसीसी म्यानमार मार्फत १० लाख रुपैयाँ सहयोगको घोषणा गैरआवासीय नेपाली संघ (एनआरएनए) का अध्यक्ष बद्री केसीले बताएका छन् ।  हामी विश्वभरका सबै एनसीसीहरूलाई विनियोजन गरिएको कोषमा थप्न रकम सङ्कलन कार्यक्रम सुरु गर्न अनुरोध गर्दछौं’, उनले भनेका छन्, ‘हामी साँच्चै विश्वभरका नेपालीद्वारा नेपालीको लागि योगदान गर्न चाहन्छौँ ।

शुक्रबार (मार्च २८) म्यानमारमा ७.७ म्याग्निच्युडको भूकम्प गएको थियो । भूकम्पको कडा धक्का थाइल्यान्डमा पनि महसुस गरिएको थियो । भूकम्पपछि संरचना भत्कँदा हालसम्म एक हजार ६०० भन्दा बढी मानिसको मृत्यु भइसकेको छ । भूकम्पबाट घाइते हुनेको संख्या बढेर ३४०८ पुगेको र १३९ जना अझै बेपत्ता रहेको बताएको छ ।