धादिङ जिल्लाको गल्छी गाउँपालिका वडा नम्बर १ लाई बुधबार एक कार्यक्रमको आयोजना गर्दै पहिलो बालमैत्री स्थानीय शासनयुक्त घोषणा गरिएको हो ।

बालबालिकामा लगानी सुनिश्चित भविष्यको थालनी बालअधिकार, बालमैत्री शासन, बालमैत्री पालिका निर्माणमा हाम्रो अभियान भन्ने नारा सहित धादिङ जिल्ला कै पहिलो बालमैत्री स्थानीय शासन घोषणा भएको हो । गल्छी गाउँपालिकाले २०७८ कार्तिक ४ गते देखि र गल्छी गाउँपालिका वडा नम्बर १ ले २०७८ पौष ०७ गते देखि बालमैत्री स्थानीय शासन राष्ट्रिय महाअभियान अवलम्बन गरी बालबालिकाको संस्थागत विकासमा कार्य गर्दै आइरहेको थियो । नेपालको संविधान २०७२ को धारा ३९मा मौलिक हक, बालमैत्री स्थानीय शासन राष्ट्रिय रणनीति, स्थानीय सरकार संचालन ऐन २०७४, बालमैत्री स्थानीय शासन कार्यान्वयन निर्देशिका २०७८, बालमैत्री स्थानीय शासन घोषणा कार्यविधि २०७९ मा उल्लेखित ५१ सूचक र मापदण्ड पूरा गरी वडालाई निकृष्ट बालश्रम, बालविवाह मुक्त र बालमैत्री स्थानीय शासनयुक्त वडा घोषणा गरिएको हो ।

बालमैत्री वडाको उद्घाटन समारोहमा जिल्ला समन्वय समिति प्रमुख नवराज अधिकारीले वडाको उपलब्धिलाई गौरवपूर्ण क्षण भन्दै अन्य वडाहरू र पालिकाहरूका लागि प्रेरणादायी उदाहरण भएको बताउनुभयो। उहाँले बालमैत्री वडा बन्नु समग्र विकासको सूचक भएको उल्लेख गर्नुभएको छ । वडा अध्यक्ष यदुकुमार खतिवडाले विगत ३ वर्षदेखि स्थानीय बालमैत्री शासन अन्तरगत पूर्व तयारी स्वरुप गल्छी गाउँपालिकाले योजना बनाएर बालमैत्री कार्यक्रम संचालन गरेको र त्यसलाई नै अनुसरण गरी वडा नम्बर १ ले बालमैत्री शासनयुक्त वडा घोषणा गर्न सफल भएकोे बताउनुुभयो ।

गल्छी गाउँपालिकाका अध्यक्ष केदारनाथ खतिवडा, जिल्ला समन्वय समिति अधिकारी राम आश्रय यादब, गल्छी गाउँपालिकाका उपाध्यक्ष भाईकाजी तिवारी, निवर्तमान जिल्ला समन्वय समितिका प्रमुख जगनाथ नेपाल, नेपाल पत्रकार महासंघ धादिङका अध्यक्ष सिताराम अधिकारी, गल्छी गाउँपालिकाका प्रमुख प्रशासकीय अधिकृत नविन गङतान लामा, गाउँपालिकाका सम्पूर्ण वडाका वडा अध्यक्षहरु, कार्यपालिका सदस्यहरु, विभिन्न राजनीतिक दलका प्रमुख तथा प्रतिनिधी, महिला समूहहरु, वडा भित्रका बालक्लबका पदाधिकारीहरु, सुरक्षकर्मी, पत्रकार लगायत सम्पूर्ण वडावासीहरुको उपस्थिती रहेको थियो,कार्यक्रममा सहभागिहरुले बालअधिकारप्रति पूर्ण प्रतिवद्धता जनाउँदै सामुहिक हस्ताक्षर समेत गरेका थिए ।