धादिङ जिल्लाको नीलकण्ठ नगरपालिका–३ धादिङबेसीस्थित नीलकण्ठ बालमन्दिर माध्यामिक विद्यालयको गम्भीर लापरबाहीका कारण २४ जना एसईई परीक्षार्थीको ग्रेड प्रभावित भएको छ ।

एसईईको नतिजा सार्वजनिक हुँदा सैद्धान्तिकतर्फ ए प्लस ल्याएका नीलकण्ठ नगरपालिका–३ पहरे चौताराका आयुस भट्टको  कम्प्युटर विषयको प्रयोगात्मकतर्फ सी प्लस मात्र आएको थियो, जुन उनका लागि अबिस्वास्निय रह्यो । विद्यालयले प्रयोगात्मकतर्फ ५० पूर्णाङ्कको सट्टा २५ पूर्णाङ्कमै मुल्याङ्कन गरेर परीक्षा बोर्डमा पठाएको खुलेको छ । यसै कारण कम्प्युटर विषय लिएका २४ जना सबै विद्यार्थीको प्रयोगात्मकमा सी प्लस वा सी ग्रेड मात्र आएको छ । शिक्षक र विद्यालयको यो लापरबाहीका कारण भट्ट ४ जिपिए ल्याउन बाट बन्चित भए भने अन्य २३ जना विद्यार्थीले नतिजा हेरेपछी झन् धेरै पीडा भएको बताए । विद्यालय प्रशासनको लापरबाही प्रति आक्रोश व्यक्त गर्दै अभिभावकले दोषीमाथि कडा कारबाहीको माग गरेका छन् । विद्यार्थीहरूले भने आफ्नो मेहनतले पाएको ग्रेडभन्दा कम अंक आउँदा मानसिक तनाव र निराशा व्यहोर्नु परेको बताएका छन् ।

यसले छात्रवृत्ति र उत्कृष्ट शिक्षालयमा पढ्न पाउने अवसर समेत गुमाउनुपर्ने अवस्था सिर्जना भएको छ । शिक्षक र विद्यालयले यस्ता घटनालाई गम्भीर रूपमा लिएर तत्काल पुनरावलोकन प्रक्रिया अघि बढाउनु आवश्यक भएको अभिभावकहरूको माग छ । 

विद्यालयका प्रधानाध्यापकले “प्राविधिक त्रुटि” भएको भन्दै क्षमायाचना गरेका छन्, विद्यार्थीको पुनरावलोकनको प्रकृया थालिएकोले छिट्टै जिपिए सुधार भएर आउने बताएका छन् ।