धादिङस्थित त्रिशूली नदीमा रसुवागढीमा आएको बाढीले बगाएकाहरु मध्ये धादिङमा ३ जनाको शवसँगै दुई वटा खुट्टा फेला परेको छ । 

रसुवाको नेपाल–चीन सीमामा रहेको ल्हेन्दे खोलामा आज बिहान आएको बाढीमा परी नेपाली र चिनियाँ नागरिकसहित २० जना बेपत्ता भएका छन् । उनिहरुको खोजीकार्य भईरहेको छ । तीन जनाको शवसँगै दुई वटा खुट्टा फेला परेको जिल्ला प्रहरी कार्यालय धादिङका प्रहरी नायव उपरीक्षक सुवास हमालले जानकारी दिए । 
प्रहरी नायव उपरीक्षक हमालका अनुसार गल्छी गाउँपालिका–२ केउरेनीटारस्थित खोला किनारमा एक जना पुरूषको शव, गजुरी गाउँपालिका–६ बेल्खुमा पुरुष एक जनाको शव र बेनिघाट रोराङ गाउँपालिका–७ चरौदीमा एक जनाको पुरुषकोशव गरि तीन जनाको शव फेला परेको छ । गजुरी गाउँपालिका–२ मलेखुमा दाहिने खुट्टा र बेनिघाट रोराङ गाउँपालिका–३ लामबगरमा त्रिशूली नदी किनारमा एउटा दाहिने खुट्टा फेला परेको हो । 

पोष्टमार्टम गर्न टिचिङ पठाइएको छ । खोजी कार्य भइ रहेको छ । 
त्रिशूलीमा लाश जल्दै गरेको चिता बाढीले बगायो
धादिङको बेनिघाट रोराङ गाउँपालिका–७ चरौंदी नजिकै त्रिशूली नदी किनारमा अन्त्येष्टि गरिँदै गरेको चिता बाढीले बगाएको जिल्ला प्रहरी कार्यालय धादिङका प्रहरी नायव उपरीक्षक सुवास हमालले जानकारी दिए । बेनिघाट रोराङ गाउँपालिका–७ की ८० वर्षिय राममायाँ चेपाङको चरौंदीस्थित त्रिशूली किनारमा दाहसंस्कार गर्दै गर्दा बाढीले जलिरहेको चिता बगाएको हो । 

हमालका अनुसार शव जल्दै गर्दा एक्कासी बाढी आयो । जलिरहेको चिता बाढीले बगायो । जलेर सकिनै लागेको चिता बाढीले बगाएको हो ।

यस्तै जिल्ला प्रशासन कार्यालय धादिङले त्रिशुली नदीको वहाव बढ्न सक्ने भन्दै सुरक्षा सतर्कता अपनाउन अनुरोध गरेको छ ।

प्रशासनले एक सूचना जारी गर्दै रसुवाको सिमावर्ती क्षेत्रमा र २४ घन्टा भित्र भोटेकोशीको जलाधार क्षेत्रमा बर्षा भएको नदेखीएकाले बाढीको उत्पति तिब्बत क्षेत्रबाट भएको र सो क्षेत्रमा थुप्रै हिमतालहरु अवस्थित रहेकाले हाल बाढी घढ्दो क्रममा रहेता पनि संभावित जोखिम रहिरहेको हुँदा त्रिशुली नदिको रसुवागढी देखी धादिङ जिल्लाको बेनीघाट सम्म नदी तटिय क्षेत्रमा सतर्कता अपनाउन अनुरोध गरेको छ ।

बाढि पूर्वानुमान महाशाखाको उपरोक्त सूचना अनुसार त्रिशुली नदीमा बाढिको जोखिम कायमै रहेकोले अर्को सूचना नआउन्जेलसम्म पृथ्वी राजमार्ग भएर यात्रा गर्ने यात्रुहरुले सडकको अवस्थाका वारेमा पुर्व सूचना लिएर मात्रै यात्रा गर्न र तटीय क्षेत्रका बासिन्दाहरुमा साविकमा झै सुरक्षा सतर्कता अपनाउन सूचनामा उल्लेख छ ।