धादिङका विभिन्न चार गाउँपालिकामा निर्माणाधीन स्वास्थ्य चौकी भवन निकै लामो समयदेखि अलपत्र अवस्थामा रहेको छ । निर्धारित समयमा भवन निर्माण नहुँदा सेवाग्राही समस्यामा परेका छन् ।

धादिङको नेत्रावती डबजोङ, गल्छी, थाक्रे, त्रिपुरासुन्दरी र गंगा जमुना गाउँपालिकामा एक साथ ठेक्का लगाइएका स्वास्थ्य चौकी भवन निर्माण सम्पन्न गर्नु भन्दा झण्डै एब वर्ष ढिलाई भएको छ । गंगा जमुना-४ स्थित गुम्दी ,नेत्रावती डबजोङ गाउँपालिका १ स्थित मार्पाक स्वास्थ्य चौकी र वडा नम्बर ५ कटुन्जे, मुलपानी र भोगटेनी सहित ४ स्थानमा निर्माण भैरहेका स्वास्थ्य चौकीका भवन निर्माण अलपत्र परेको छ । 

चार वटै स्वास्थ्य चौकीको लागत अनुमान १० करोड ७३ लाख ९१ हजार ७ सय ८२ रुपैयाँ गरिएकोमा कटुन्जे स्वास्थ्य चौकी भवनको मात्रै लागत २ करोड ७० लाख ३१ ह्जार ७ सय ६९ रुपैयाँ लागत अनुमान गरिएको थियो ।  यी स्वास्थ्य चौकीको निर्माण काठमाडौको वानेश्वर स्थित रविना÷अविशा÷विकोन जेभीले २०७७ फागुन २० मा ठेक्का सम्झौता गरी २०८१ असोज ७ गते भित्र सम्पन्न गर्ने लक्ष्यका साथ निर्माण सुरु गरेको थियो । निर्माण सम्पन्न गर्ने मिति पुरा भएपनि अहिले सम्म जम्मा ५५ प्रतिशत मात्रै भौतिक प्रगति भएको छ भने वित्तिय प्रगति ३६ प्रतिशत भएको सघन सहरी तथा भवन निर्माण आयोजना धादिङले जनाएको छ । बोलकोवल अनुसार निर्माण व्यवसायी रविना÷अविशा÷विकोन जेभीसंग ७ करोड ६२ लाख ३५ हजार ८ सय ४१ रुपैयाँमा ठेक्का सम्झौता भएको थियो । स्वास्थ्य चौकीको भवन निर्माणमा हाल सम्म २ करोड ७२ लाख ८९ हजार ५ सय ४१ रुपैयाँ खर्च भइसकेको आयोजनाले जनाएको छ । निर्माण सम्पन्न गर्ने समय धर्किसकेपनि निर्माण व्यवसायी अहिले सम्म म्याद थपका लागि निवेदन नदिएको आयोजनाले जनाएको छ । निर्माण व्यवसायी सम्पर्कमै नआएको र म्याद थपको लागि निवेदन नदिएकाले ठेक्का सम्झौता रद्ध गर्ने सम्मको चेतावनी आयोजनाले दिएको छ ।

निर्माण व्यवसायी आएर म्याद थपका लागि निवेदन दिएमा जरिवाना सहित म्याद थप हुन सक्ने अन्यथा सम्झौता नै रद्ध हुने सघन सहरी तथा भवन निर्माण आयोजनाका प्रमुख शशिन्द्र घिमिरेले बताए । मार्पाक स्वास्थ्य चौकीका भवन समयमा निर्माण नभएका कारण पुरानै भवनबाट जसो तसो स्वास्थ्य सेवा प्रदान गरिदै आइएको छ । नयाँ भवन नभएका कारण सेवाग्राही र स्वास्थ्यकर्मी दुवैले सास्ती खेप्न बाध्य मार्पाक स्वास्थ्य चौकीका प्रमुख कविता बोगटी बताऊछिन । आयोजना र ठकेदारको सम्वन्यको अभावमा भवन निर्माणमा ढिलाइ भएकाले स्थानीय आफूहरुले पनि आरोप खेप्नु पर्ने अवस्था भएको जनप्रतिनिधिहरुको भनाइ छ । निर्माण कम्पनी र सरोकारवाला निकायलाई छिटो काम गर्न जनप्रतिनिधि ठाकुर गुरुङको भनाइ छ ।

त्यस्तै आयोजनाले नै निर्माण गरिरहेको नेत्रावती डबजोङ गाउँपालिका स्थित मार्पाक, गल्छी गाउँपालिका स्थित कल्लेरी, थाक्रे गाउँपालिका स्थित तस्रपुर र त्रिपुरासुन्दरी स्थित सल्यानकोट स्वास्थ्य चौकी भवनको निर्माण भने अन्तिम चरणमा पुगेको आयोजनाले जनाएको छ । यी स्थानमा होम निर्माण हाइवे कन्ट्रक्सन गोर्खाले स्वास्थ्य चौकी भवन निर्माण गरिरहेको छ । २०७७ फागुन १४ गते ठेक्का सम्झौता गरी २०७९ जेठ २८ गते निर्माण सम्पन्न गर्नुपर्नेमा हाल सम्म ९० प्रतिशत भौतिक प्रगति, वित्तिय प्रगति ७५ भएको र अन्तिम पटक मंसिर सम्मको लागि म्याद थप गरिएको छ । यस्तै नेत्रावती डबजोङ गाउँपालिका स्थित कटुन्जे स्वास्थ्य चौकिको जम्मा ५५ प्रतिशत काम सम्पन्न भएको छ । थपिएको म्याद भित्र जसरी पनि सम्पन्न गर्ने निर्माण व्यवसायीले प्रतिवद्धता जनाएको आयोजनाको भनाइ छ ।

स्वास्थ्य चौकी भवन निर्माणमा ढिलाई गरेपछि सघन सहरी तथा भवन निर्माण आयोजना धादिङले ठेक्का रद्द गर्ने चेतावनीसमेत दिएको छ । आम नागरिकलाई आधारभूत स्वास्थ्य सेवा प्रवाह गर्नका लागि भवन निर्माण अलपत्र भएपछि नागरिकको स्वास्थ्य सेवा पाउने अधिकार प्रभावित भएको छ ।