बुधबार डिभिजन वन कार्यालय धादिङको वार्षिक कार्यक्रम राष्ट्रिय वन संरक्षण तथा व्यवस्थापन कार्यक्रम अन्तर्गत डिभिजन स्तरीय समन्वय बैठक सम्पन्न भएको छ । 

धादिङको भूगोल र हावापानी टिमुरको लागि उपयुक्त भएको र बजार पनि राम्रो भएकोले टिम्बर बढी लगानी गरिएको जानकारी दिइएको छ । धादिङ टिमुरको हब बनाउने सम्भावना भएकाले स्थानीय तहहरुलाई आह्वान गरिएको छ । उहॅाले धादिङका सम्पूर्ण कबुलियत वन नवीकरण घोषण पनि गरेका छन् । डिभिजन वन कार्यालयले ४३ हजार ९ सय टिमुरका बिरुवा वितरण गर्न सफल भएको जानकारी कार्यालय प्रमुख विष्णु प्रसाद आचार्यले बताउनुभयो । 

डिभिजन वन कार्यालय धादिङले जिल्लाका सामुदायिक तथा कबुलियती वन उपभोक्ता समूहहरूलाई पुरस्कृत गरेको छ । वन संरक्षणमा जिल्लामा अब्बल ठहरिएका सामुदायिक वन उपभोक्ता समितिहरूलाई नगद सहित पुरस्कृत सहित सम्मान गरिएको हो । सामुदायिक वनको संरक्षण र व्यवस्थापन गतिविधिलाई आधार मानेर सामुदायिक वन उपभोक्ता समितिमध्ये मूल्याङ्कनका आधारमा उपभोक्ता समितिलाई उत्कृष्ट सामुदायिक वनका रूपमा पुरस्कृत गरिएको डिभिजन वन कार्यालयका प्रमुख बिष्णु प्रसाद आचार्यले बताउनुभयो । 

कबुलियती वन समूहतर्फ बेनिघाट रोराङ वडा नं १० को संसारी डाँडा प्रथम, बेनिघाट रोराङ वडा नं १ को परिवर्तनशील कबुलियती वन उपभोक्ता समूह द्वितीय, र सिद्धलेक वडा नं ६ को समिटार कबुलियती वन उपभोक्ता समूह तृतीय भएका छन् । 

यस्तै सामुदायिक वनतर्फ त्रिपुरासुन्दरी वडा नं ५ को श्री सल्यान कठेरी सामुदायिक वन उपभोक्ता समूह प्रथम, बेनिघाट रोराङ वडा नं ५ को विशाल संयुक्त सामुदायिक वन उपभोक्ता समूह द्वितीय, र गजुरी वडा नं ५ को ठूलो वन सामुदायिक वन उपभोक्ता समूह तृतीय भएका छन् ।

जिल्ला समन्वय समिति धादिङका प्रमुख नवराज अधिकारीको संयोजकत्वमा आयोजित उक्त कार्यक्रममा उप–प्रमुख कुलमान विश्वकर्मा, नीलकण्ठ नगरपालिकाका उप–प्रमुख दीपक विश्वकर्मा, सहायक प्रमुख जिल्ला अधिकारी मोहन प्रसाद न्यौपाने, जिल्ला समन्वय अधिकारी रामश्रय यादव र डिभिजन वन कार्यालयका प्रमुख विष्णु प्रसाद आचार्यको लगायत विभिन्न वन उपभोक्ता समितिका प्रतिनिधिहरुको उपस्थिति रहेको थियो ।