धादिङ जिल्ला अदालतले चालु आर्थिक वर्षमा पाँच वर्ष यताकै सबैभन्दा धेरै मुद्दा टुंग्याएको छ। न्याय सम्पादनमा तीव्रता ल्याउँदै अदालतले न्यायमा सहज पहुँच र समयमै फैसला दिने आफ्नो प्रतिबद्धता प्रमाणित गरेको हो ।

यस वर्ष कुल १ हजार ५ सय ५१ मुद्दा लागत रहेकोमा यस वर्ष १ हजार २ सय २५ मुद्दा फर्छ्यौट भई  ३ सय २६ मुद्दा बाँकी रहेको छ । यसरी हेर्दा यस वर्ष ७८ दशमलव ९८ प्रतिशत फर्छ्यौट भएको छ । आर्थिक वर्ष ०८१।८२ मा अघिल्लो  वर्षबाट लगत बाँकी सरेर आएको थियो । यसमध्ये जिल्ला अदालतले ५ सय ८ मुद्दा फर्छ्यौट गरेको  छ । यस आर्थिक वर्षमा एक हजार १९ मुद्दा दायर भएकोमा जिलला अदालतले ७ सय १७ मुद्दा फर्छ्यौट गरेको जिल्ला अदालतका श्रस्तेदार माधव भण्डारीले बताए ।

आर्थिक वर्ष ०७७।७८ मा १ हजार ४ सय ५३ मुद्दा लगत रहेकोमा ४८ दशमलव ०४ प्रतिशत फर्छ्यौट भएको थियो । आव ०७८।७९ मा १ हजार ७ सय ६ मुद्दा लगत रहेकोमा ९ सय ६७ थान मुद्दा अर्थात ५६ दशमलव ६८ प्रतिशत मुद्दा फर्छ्यौट भएको थियो । आव ०७९।८० मा १ हजार ६ सय ९९ मुद्दा लगत रहेकोमा १ हजार १३ थान मुद्दा अर्थात ५९ दशमलव ६२ प्रतिशत मुद्दामात्र फर्छ्यौट भएका थिए ।यसैगरी आव ०८०।८१ मा १ हजार ७ सय ३९ मुद्दा लगात रहेकोमा १ हजार २ सय ७ अर्थात ६९ दशमलव ४१ प्रतिशत मुद्दा फर्छ्यौट भएको श्रेस्तेदार भण्डारीले जानकारी दिए ।

जिल्ला अदालतले आव ०८१।८२ मा लागु औषधका ३६ थान मुद्दामध्ये २९ थान, करणी सम्बन्धी कसुरका ६२ मध्ये ५८ थान, ज्यान सम्बन्धी कसुरका ३५ मध्ये २७ थान, सवारी ज्यान तथा अंगभंग सम्बन्धी ४७ मध्ये ३१ था, चेक अनादरका ७६ मध्ये ५९ थान, सम्बन्ध बिच्छेदका ६ सय ५९ मध्ये ५ सय ४७ थान, अंश मानाचामल सम्बन्धी १ सय ४८ मध्ये १ सय १८ थान, र घरेलु हिंसाका ९ मध्ये ४ थान तथा अन्य ४ सय ७९ मध्ये ३ सय ५२ थान मुद्दा फर्छ्यौट भएको छ । जिल्ला अदालतमा कुनैपनि मुद्दा दुइ वर्ष नाघेका छैनन् । १८ महिनादेखि २ वर्ष भित्रका ६ थान मुद्दा रहेको छ भने एक वर्षदेखि १८महिना भित्रका १८ थानमात्र मुद्दा फर्छ्यौट हुन बाँकी रहेको छ ।

 यो प्रतिशत अहिलेसम्मकै पहिलो रेकर्ड भएको जिल्ला अदालतले जनाएको छ । विगत पाँच वर्षलाई हेर्दा पनि मुद्दाको फर्छ्यौट दर न्यून रहेको देखिन्छ ।