धादिङबेसीमा शिक्षा ऐनप्रति असन्तुष्टि जनाउँदै विरोधस्वरूप  निजी तथा आवासीय विद्यालयहरूले आज विरोध प्रदर्शन गरेका छन्  ।

प्याब्सन, एनप्याब्सन, हिसान र अपेनको संयुक्त आह्वानमा गरिएको प्रदर्शनमा धादिङका विद्यालयहरूको सक्रिय सहभागितामा ३० भन्दा बढी स्कुल बससहित सवारी जुलुस निकालेका हुन् ।  विद्यालय सञ्चालकहरूले संघीय शिक्षा ऐनमार्फत निजी विद्यालयहरूलाई क्रमशः बन्द गर्ने तयारी भएको भन्दै कडा आपत्ति जनाएका छन् । सरकारले ल्याउन लागेको नयाँ ऐन विभेदकारी छ र यसले निजी विद्यालयको अस्तित्वलाई चुनौती दिनेछ । प्याब्सन धादिङका अध्यक्ष दिनेश भट्टले शिक्षा ऐनमा समावेश प्रावधानहरू अन्यायपूर्ण भएको बताए । सो आन्दोलनमा धादिङ उद्योग वाणिज्य संघका अध्यक्ष रामकुमार डल्लाकोटीले पनि ऐक्यबद्धता जनाउँदै विद्यालयहरूको माग सम्बोधन गर्न सरकारलाई आग्रह गरेका छन्  ।

विद्यालयहरूले पूर्ण छात्रवृत्ति प्रावधान खारेज गर्नुपर्ने, पोशाक, स्टेशनरी तथा खानपान उपलब्ध गराउनुपर्ने बाध्यकारी व्यवस्था हटाउनुपर्ने, कम्पनी ऐनअन्तर्गत दर्ता भएका विद्यालयलाई गैरनाफामूलक बनाउन खोजिएको प्रावधान हटाउनुपर्ने लगायतका माग अघि सारेका छन् माग पूरा नभएसम्म आन्दोलन जारी रहने चेतावनी विद्यालयहरूले दिएका छन् ।