धादिङको सदरमुकाम धादिङबेशी देखि त्रिपुरासुन्दरी गाउँपालिकाको सल्यानटार जोड्ने सडकमा राखिएका  ट्राफिक संकेत उल्टो पाल्टो भएका कारण दुर्घटनाको जोखिम बढाएको छ  । 

धादिङबेशीबाट त्रिपुरासुन्दरी गाउँपालिकाको सल्यान्टार जोडन्  सडक कालोपत्रे भएर सञ्चालनमा आएको झण्डै ६ वर्ष पुग्न लाग्यो । एसियाली विकास बैंक(एडीबी)ले निर्माण गरेको यो सडकमा ठाउँ ठाउँमा घुम्ती, उकालो, ओरालो  सडकमा दुई तर्फी यातायातका साधन सञ्चालन हुन्छन् । झट्ट हेर्दा सडक ठिकठाक जस्तो देखिन्छ तर यो सडकमा राख्नु पर्ने ट्राफिक संकेत भने सही रुपमा छैनन् साथै आवश्कता अनुसार पनि छैनन् । सड़कमा राखिएको ट्राफिक संकेत हेर्दा यहाँ सडक मोडिएको एकातर्फ छ तर ट्राफिक संकेतले उल्टो दिशा देखाइरहको छ । ट्राफिक संकेत सही स्थानमा नभएका कारण यो सडकमा सवारी साधन चलाउनेहरुलाई असहज त भइरहेको छ साथमा दुर्घटनाको जोखिम समेत बढेको चालक लक्ष्मण रिमालको भनाई छ । उल्टो पाल्टो गरेर ट्राफिक संकेत राखेकोमा सडक विभागले ध्यान दिनु पर्ने चालकको भनाइ छ । सडक विभागले ट्राफिक संकेत सही स्थान र सही रुपमा नराखिदिँदा दैनिक आवत जावत गर्ने  सवारी साधनहरुलाई बढी समस्यामा पर्ने गरेका छन्  ।

ग्रामिण सडकमा त ट्राफिक संकेत लगभग शुन्य बराबर हुन्छन् । सडक सुरक्षा विज्ञहरूका अनुसार नेपालमा हरेक वर्ष सडक संकेत चिन्हको अभाव, गलत स्थानमा राखाइ वा क्षतिग्रस्त अवस्थाका कारण ठूलो संख्यामा दुर्घटना हुने गरेको छ । सडक विभाग लगायतका सरोकारवाला निकायले ट्राफिक संकेत अविलम्ब राखेर दुर्घटना न्यूनीकरणमा ध्यान दिन आवश्यक छ ।