देशभर फैलिएको जेन जी आन्दोलन अन्तर्गतको पछिल्लो प्रदर्शन हिंसात्मक बन्दा ठूलो मानवीय क्षति भएको छ । पछिल्ला तथ्याङ्कअनुसार प्रदर्शनमा परी मृतकको संख्या १९ पुगेको छ । भने ४२२ जना घाइते  विभिन्न अस्पतालहरूमा उपचाररत छन् ।

स्वास्थ्य तथा जनसंख्या मन्त्रालयले देशभरका विभिन्न अस्पतालबाट लिएको विवरण अनुसार, मृतकको संख्या १९ पुगेको हो । काठमाडौंको सिभिल अस्पतालमा ३, राष्ट्रिय ट्रमा सेन्टरमा ८, एभरेष्ट अस्पतालमा ३, केएमसी अस्पतालमा २, त्रिवि शिक्षण अस्पतालमा १, विपि कोइराला स्वास्थ्य विज्ञान प्रतिष्ठानमा २ जनाको मृत्यु भएको स्वास्थ्य मन्त्रालयले जनाएको छ । त्यस्तै काठमाडौै बाहिर सुनसरीको इटहरीमा  प्रहरीको गोली लागेर २ जनको मृत्यु भएको छ । त्यस्तै, देशभर विभिन्न अस्पतालमा ४ सय २२ जना घाइते उपचाररत छन् । 

समाजिक सञ्जाल बन्द र शासकीय अव्यवस्थाविरुद्ध विरोधमा प्रदर्शनमा उत्रिएका हुन् । सन् १९९७ देखि सन् २०१२ सम्म जन्मिएकाहरूलाई 'जेन जी' पुस्ता भनिन्छ ।

यिनीहरूले सामाजिक सञ्जालको भित्तामा आन्दोलन गर्दै आएकामा सरकारले सामाजिक सञ्जाल बन्द गरेपछि सडकमा आएका हुन् । तर सरकारले सडकमा आएको पहिलो दिन नै 'जेन जी' माथि बर्बरतापूर्वक गोली चलाएको छ ।