नेपालका प्रथम जननिर्वाचित प्रधानमन्त्री तथा प्रजातान्त्रिक आन्दोलनका अग्रदूत बिपी कोइरालाको धादिङ जिल्लाको सदरमुकाम धादिङबेसी क्याम्पस चोकमा सोमबार आयोजित विशेष समारोहबीच विपीको शालिक अनावरण गरिएको छ ।

शालिक अनावरण गर्दै पूर्व उपप्रधान मन्त्री एवम् नेपाली कांग्रेसका उपसभापति पूर्ण बहादुर खड्काले  बिपी कोइरालाले ल्याएको लोकतान्त्रिक विचार, समाजवादप्रतिको आस्था र राष्ट्रिय एकताको संदेश आज पनि उतिकै प्रासंगिक रहेको बताएका थिए । बिपीलाई केवल राजनीतिक व्यक्तित्वका रूपमा नभई साहित्यकार, चिन्तक र दूरदर्शी नेताका रूपमा सम्झनुपर्नेमा जोड दिए । बिपीको संघर्षमय जीवन, प्रजातन्त्रका लागि गरेको बलिदान र नेपाली समाजलाई दिएको योगदानबारे चर्चा गर्दै नयाँ पुस्ताले पनि उहाँका आदर्शबाट प्रेरणा लिनुपर्ने उनको भनाई छ ।

अनावरण कार्यक्रममा विभिन्न राजनीतिक दलका नेता, स्थानीय तहका जनप्रतिनिधि, सरोकारवालाहरू, शिक्षक, विद्यार्थी तथा सर्वसाधारण नागरिकहरूको उल्लेखनीय उपस्थिति थियो।