भदौ २३ र २४ मा भएको जेनजी प्रदर्शनका क्रममा देशभर ७३ जनाको मृत्यु भएको पुष्टि भएको छ,यसैगरी प्रहरीतर्फ ३ जनाको मृत्यु भएको छ । 

नयाँ बानेश्वर क्षेत्रमा प्रहरीले चलाएको गोली लागेर घटनास्थलमै र अस्पतालमा उपचारको क्रममा २१ प्रदर्शनकारीको मृत्यु भएको छ । मृतकहरुमा प्रदर्शनकारीतर्फ बुद्धिबहादुर तामाङ, सन्तोष बिक, सुलभराज श्रेष्ठ, श्रीयम चौलागाईं, ईस्वत अधिकारी, आयुष थापा मगर, सौरभ जोशी, योग बहादुर श्रेष्ठ, माधव सारुमगर, बिमल बावु भट्ट, असहाव आलम ठकुराई, शौरन किशोर श्रेष्ठ, सुवास कुमार बोहरा, रसिक खतिवडा, विनोद महर्जन, दिल नारायण तामाङ, योगेन्द्र न्यौपाने, छत्रमान कुथुमी, ओझन बुढा, अविषेक श्रेष्ठ र मोहन सरदार ‘चंखे’ छन् । प्रहरीतर्फ मृत्यु हुनेमा असई मिलन राय, सहायक हवल्दार अमृत गुरुङ र जवान उत्तम थापा छन् । यसैगरी भदौ २४ मा भएको लुटपाट र आगजनीको क्रममा ३८ जनाको मृत्यु भएको छ । भाटभटेनी सुपरमार्केट तथा व्यक्तिहरूको घरमा जलेको अवस्थामा १५ जनाको शव भेटिएको छ । कैदीबन्दी तथा बाल बन्दीतर्फ १० जनाको मृत्यु भएको छ । महाराजगञ्जस्थित शिक्षण अस्पतालमा ३० शवको पोस्टमार्टम सम्पन्न भइसकेको छ, जसमा २७ शव परिवारले बुझिसकेका छन् । अझै १६ शवको पोस्टमार्टम बाँकी छ, जसमा ७ वटा शव पूर्ण रूपमा जलेर पहिचान गर्न नसकिने अवस्थामा छन् । फोरेन्सिक विभागका अनुसार ती शवको पहिचान फिङ्गर प्रिन्ट, डेन्टल परीक्षण वा डीएनएमार्फत गरिनेछ,प्रहरी प्रवक्ता डीआईजी विनोद घिमिरेले जानकारी दिए । 

सरकारले मृतकको सम्मानमा असोज १ गते शोक दिवस मनाउने र राष्ट्रिय शोक मनाउने, झण्डा आधा झुकाउने, मृतकका परिवारलाई जनही १० लाख राहत र अन्य खर्चका लागि पाँच लाख गरी १५ लाख रुपैयाँ प्रदान गर्ने बैठकले निर्णय गरेको छ ।