जेन–जी आन्दोलनका क्रममा देशका विभिन्न कारागारबाट भागेका ५७ सय कैदीबन्दी अझै फरार रहेका छन्  ।

ठूलो सङ्ख्यामा विभिन्न कसुरमा कैद सजाय भुक्तान गरिरहेका कैदी फरार हुँदा समाजमा सुरक्षा चुनौती थपिएपछि सरकारले फरार कैदीबन्दीलाई कारागारमा फर्काउन विशेष अभियान सञ्चालन गरिरहेको छ । गृह मन्त्रालयले गएको असोज १० गते फरार कैदीबन्दीलाई हिजोसम्म कारागार फर्कन ‘अल्टिमेटम’ दिएको थियो । देशभरको सुरक्षाबलले ती फरार कैदीबन्दीहरूलाई खोजी कार्य जारी राखेको जनाएको छ । आन्दोलनका क्रममा कारागारमा आक्रमण र तोडफोड भएपछि कैदीहरूले सामूहिक रूपमा भागेका थिए । कारागार व्यवस्थापन विभागका निर्देशक चोमेन्द्र न्यौपानेका अनुसार पाँच हजार ७९ कैदी र ६ सय १८ बालबन्दी गरी कूल पाँच हजार ६ सय ९७ बन्दी अझै फरार छन् । तीमध्ये हत्या, बलात्कार, लागुऔषध कारोवार र भ्रस्टाचार जस्ता गम्भीर अपराधमा सजाय पाएका कैदी पनि छन् ।सुरक्षा निकायले ती फरार कैदीहरू देशका विभिन्न भागमा लुकेर बसेको हुन सक्ने आशंका गर्दै सीमावर्ती क्षेत्रमा विशेष निगरानी बढाएको जनाएको छ । प्रदर्शन चर्केपछि विभिन्न २८ वटा कारागारबाट १३ हजार पाँच सय ८९ कैदी र नौ वटा बालसुधारगृहबाट नौ सय ६४ बालबन्दी गरी १४ हजार पाँच सय ५३ बन्दी भागेका थिए । त्यसमध्ये अहिलेसम्म आठ हजार पाँच सय १० कैदी र तीन सय ४१ बालबन्दी गरी कूल आठ हजार आठ सय ५१ बन्दी कारागार फर्केका छन् ।

मन्त्रालयले कारागार बाहिर रहेका कैदीबन्दीलाई खोजी, नियन्त्रण र पक्राउ गरी कारागारमा शीघ्र फिर्ता ल्याउन सम्बन्धित जिल्लाको सहायक प्रमुख जिल्ला अधिकारीको संयोजकत्वमा सुरक्षा तथा अन्य निकायका प्रतिनिधि सदस्य रहने गरी फरार बन्दी खोजी तथा पक्राउ कार्यदलसमेत गठन गरेको थियो ।