बेनिघाट रोराङ गाउँपालिका–१०, जवाङस्थित मोवाखोला सामुदायिक वनमा प्राकृतिक सुन्दरता, हरियाली र आकर्षक वनक्षेत्रका लागि चिनिएको पारिजात जंगललाई पर्यटन गन्तव्यका रूपमा विकास गर्ने उद्देश्यसहित  डिभिजन वन कार्यालय धादिङको नेतृत्वमा एक टोलीले जंगल अवलोकन कार्यक्रम सम्पन्न गरेको छ । 

वनभित्र लगभग १.८ हेक्टर क्षेत्रफलमा फैलिएको सुन्दर पारिजात जंगललाई संरक्षण गर्दै पर्यटकीय गन्तव्यस्थलको रूपमा विकास गर्ने उद्देश्यले अवलोकनमा वन कार्यालयका अधिकारी, स्थानीय जनप्रतिनिधि, सामुदायिक वन उपभोक्ता समूहका सदस्य तथा पर्यटन क्षेत्रसँग सम्बन्धित सरोकारवाला सहभागी थिए । आवश्यक पूर्वाधार निर्माणका लागि योजना तयार पारिने र आगामी वर्षदेखि चरणबद्ध रूपमा कार्यान्वयन सुरु गरिने तयारी भइरहेको छ। पारिजात जंगललाई आन्तरिक तथा बाह्य पर्यटकका लागि नयाँ गन्तव्यका रूपमा विकास गर्ने लक्ष्य लिइएको छ । जहाँ वर्षैभरि हरियाली, शुद्ध हावा र रमणीय दृश्यावलोकनका कारण आगन्तुकहरू आकर्षित भइरहेका छन् । सो क्षेत्रलाई व्यवस्थित गरी आन्तरिक तथा बाह्य पर्यटकका लागि सुरक्षित र आकर्षक गन्तव्य बनाउने उद्देश्यले अवलोकन गरिएको डिभिजन वन कार्यालयका प्रमुख विष्णु प्रसाद आचार्यले जानकारी दिए ।

पदमार्ग निर्माण, विश्रामस्थल, दृश्यावलोकन टावर, सूचना पाटी, सुरक्षाको व्यवस्था भएमा
यसको संरक्षण गर्दै विकास गर्न हामी तयार छौँ । पारिजात जंगल हाम्रो गाउँको गर्व हो । यदि यसलाई राम्रोसँग व्यवस्थापन गरियो भने पर्यटनसँगै रोजगारी र आम्दानीका अवसर सिर्जना हुन्छन्, भने जंगल संरक्षणमा स्थानीयवासीहरूले सहयोग गर्न प्रतिबद्धता जनाएका छन् ।

पारिजात जस्ता दुर्लभ वनस्पति पाइने ठाउँलाई संरक्षण गर्न सकिएमा स्थानीय आर्थिक उन्नति, रोजगारी सिर्जना र सामुदायिक सहभागिता बढ्ने कुरामा सञ्चारकर्मीहरूले यस्तो प्राकृतिक सम्पदाको प्रचार–प्रसारमा आफूहरूले सक्रिय भूमिका खेल्ने प्रतिबद्धता व्यक्त गरेका छन् ।

यस अवलोकनका कारण पारिजात जंगललाई जिल्लाको नयाँ पर्यटकीय गन्तव्यका रूपमा स्थापित गर्ने सम्भावना थप प्रष्ट देखिएको सरोकारवालाहरूले बताएका छन् ।