धादिङको उत्तरी क्षेत्रमा पर्ने गंगाजमुना मेला हरेक वर्ष हरिबोधनी एकादशीको दिन लाग्ने धार्मिक तथा पर्यटकीय मेला कार्तिक १४ गते बाट सुरु हुँदै छ ।

करिब १,८०० मिटर उचाइमा अवस्थित गङ्गाजमुना पर्वत शृङ्खलाबाट धादिङका विभिन्न क्षेत्र, गोरखाको उत्तरी भाग, रसुवा, नुवाकोट, गणेश हिमाल र काठमाडौँसम्मको मनोरम दृश्यावलोकन गर्न सकिन्छ । गङ्गाजमुना गाउँपालिकाको नाम पनि यही मेलाको नामबाट राखिएको हो । गंगाजमुना गाउँपालिका-५, ढाँडखर्कमा अवस्थित झरना दुई गंगा र जमुना, तीन सय मिटर उचाइबाट खस्छ । स्थानीय विश्वास अनुसार हरिबोधनी एकादशीको अघिल्लो रात भक्तजनहरू जाग्राम बस्ने र भोलिपल्ट बिहानै नजिकैको महादेव मन्दिरमा दीप बाल्ने, फूलको डोली, गाईको दुध चढाउने र जिउँदो परेवा उडाउने धार्मिक परम्परा रहँदै आएको छ । मन्दिरमा बली नचढाइने भएकाले भक्तजनहरूले भाकल पूरा गर्नका लागि परेवा उडाउने गर्छन्  ।

तेह्र सय वर्ष अगाडि गङ्गा र जमुना नाम गरेका दुई छोरी बेपत्ता भएको र परिवारले खोज्दै जाँदा गुफाभित्रबाट हामी यही सुरक्षित छौँ, हाम्रो यही पूजापाठ गर्नुहोला भनेपछि उनै गङ्गा र जमुनाको सम्झनामा हरेक वर्ष गङ्गाजमुना माईको मेला सुरु भएको किम्बदन्ती छ । गङ्गा र जमुना नामका दुई झरना यस स्थलका प्रमुख आकर्षण हुन् । तीन सय मिटर माथिबाट झर्ने यो झरनामा नुहाएर मनले चिताएको पूरा होस् भनेर आर्शिवाद माग्ने चलन छ । झरना झरेको पहराको बीचमा रहेको महादेवको पूजाआजा गरिन्छ । त्यहाँ अवस्थित ‘गङ्गाजमुना झरनासँगै रहेको कुकुर धारोमा नुहाउनेको घुइँचो लाग्छ,विशेष गरी वर्षभरि कुकुर वा अन्य कुनै जनावरले टोकेमा त्यसको दोष निवारणका लागि कुकुरधारोमा नुहाउने चलन जनविश्वास रहँदै रहिआएको गाउँपालिका अध्यक्ष भक्तबहादुर लामाले बताए ।

मेलामा छिमेकी जिल्ला रसुवा, नुवाकोट, चितवन, गोर्खा, तनहुँ, कास्की, काठमाडौँलगायतबाट भक्तजन सहभागी हुन्छन् । राति झाँक्री नाच र सांगीतिक कार्यक्रमले मेलालाई अझ जीवन्त बनाउँछ । भक्तजनले आफ्ना परम्परागत भेषभूषा र सांगीतिक कला प्रदर्शन गरेर रौनक थप्छन् । बिहान झरनामा स्नान गरी पूजापाठ गरेर फर्कन्छन् ।

हालसम्म सडक पूर्वाधार,पार्किङ र सुरक्षासम्बन्धी सुविधा विकास भएमा गंगाजमुना झरना नेपाल कै प्रमुख धार्मिक तथा पर्यटकीय हिसाबले महत्वपूर्ण गन्तव्य बन्न सक्छ ।