धादिङबेसीमा शनिबार प्रतिगामी षड्यन्त्रका विरुद्ध आवाज उठाउँदै, संविधान र लोकतन्त्रको रक्षा तथा संसद पुनस्थापनाको लागि एमालेले धादिङमा जनप्रदर्शन सम्पन्न गरेको छ ।

जनसभालाई सम्बोधन गर्नुहुँदै एमालेका पोलिटव्युरो सदस्य खिलाल भट्टराईले एमाले संगठनले जनताको हित र राष्ट्रिय स्वाधीनताको पक्षमा एकजुट भई अगाडि बढ्ने प्रतिवद्धता रहेको बताउनुभयो । हालका गतिविधिहरूले संविधान,जनादेशविपरीत राष्ट्रलाई अस्थिर बनाउन खोजिएको र देशलाई सही बाटोमा हिँडाउन नेकपा एमाले मात्रै अहिलेको विकल्प रहेको बताउनुभयो । असंवैधानिक तरिकाबाट गठन भएको सुशिला कार्की नेतृत्वको सरकारलाई संविधानले नचिन्ने उहाँले दावी गर्नुभयो ।

त्यस्तै केन्द्रिय सदस्य एवं धादिङ इन्चार्ज खेम प्रसाद लोहनीले संविधानको रक्षाको लागि एमाले जतिबेला पनि तयार रहेको बताउनुभयो । ‘टापटिपे आवाराहरुले देश चलाइरहेको छ । यो खराव अवस्थालाई परिवर्तन गरेर जनताको शासन व्यवस्थालाई अगाडि ल्याउन एमाले विद्रोहमा निस्किरहेको छ’, उहाँले भन्नुभयो ।

सभालाई सम्बोधन गर्नुहुँदै एमाले धादिङका अध्यक्ष भुमि त्रिपाठीले संविधान संशोधन संसद र प्रतिनिधिसभाले मात्रै गर्न सक्ने भएकोले प्रतिनिधिसभालाई व्युझाउन आवश्यक रहेको बताउनुभयो । चुनावमा जान वैधानिक सरकार बनाउन पनि भङ्ग भएको प्रतिनिधिसभा पुनस्थापना गरेर चुनावको मिति तोक्नुपर्ने दावी गर्नुभयो ।

जेलबाट भागेका अपराधिहरुको हातमा प्रहरीसँग लुटिएको गोलीगठ्ठाहरु फिर्ता गराएर अपराधिहरुलाई कारबाही गरी दलका नेता कार्यकर्ता जनता र मतदाता माझ जानसक्ने वातावरण सिर्जना गर्नुपर्ने एमाले धादिङका उपाध्यक्ष अर्जुन कुमार श्रेष्ठ गोर्खालीले बताउनुभयो । यो सरकारले आतंकलाई प्रसय दिएर दलहरुलाई वेवास्था गरिरहेको उहाँले जिकिर गर्नुभयो ।

प्रदर्शनपछि उपाध्यक्ष अर्जुन कुमार श्रेष्ठ (गोर्खाली), सचिव राधिका सापकोटाले सम्बोधन गर्नुभयो । कार्यक्रममा जिल्ला कमिटी, जनवर्गीय संगठन, युवा,स्थानीय तहका नेता, कार्यकर्ता, व्यापारी, महिला समूह तथा सर्वसाधारणको उल्लेख्य सहभागी थिए ।