औषधि व्यवसाय संञ्चालनमा रहेका कानुनी व्यवस्थालाई संशोधन गर्न माग गर्दै धादिङलगायत देशभरका औषधि व्यवसायीहरूले सरकारविरुद्ध आन्दोलन सुरु गरेका छन् ।

नेपाल राजपत्रमा गत साउन १४ मा प्रकाशित औषधि ऐन, २०३५ को दफा ११ को उपदफा ३ संशोधन र उपदफा ५ खारेजीको माग राख्दै संघर्षका कार्यक्रमहरू घोषणा गरेको हो । उक्त दफामा रहेका औषधि पसल/फर्म दर्ता नवीकरण म्याद सकिएको भोलिपल्ट देखि शतप्रतिशत जरिवाना र ३१ औँ दिनमा स्वतः व्यवसाय रद्द हुने प्रावधान राखिएकाले उक्त प्रावधानले व्यवसायीहरूलाई गम्भीर मर्का पारी व्यवसाय नै धरासायी बनाएको भन्दै अव्यावहारिक दफाहरूको संशोधन / खारेजीका लागि आन्दोलनको कार्यक्रम घोषणा सोही अनुरुप धादिङका औषधी व्यवसायीहरूले आज बिहान ११:०० बजेदेखि मध्यान्ह १२:०० बजेसम्म आ-आफ्नो औषधि पसल (फार्मेसी) बन्द गर्ने  घोषणा गरेको औषधी व्यवसायी संघ जिल्ला शाखा धादिङका अध्यक्ष अशोक खनालले बताउनुभयो ।

औषधि ऐन, २०३५ लाई संशोधन गरेर बनेको ऐनमा एक महिनाभित्र संस्था नविकरण नगरे स्वतः खारेज हुने व्यवस्था गरिएको छ । त्यसप्रति व्यवसायीहरुको आपत्ति छ । त्यसैगरी उनीहरुले समयमा नविकरण नभए नविकरण दस्तुर पनि सय प्रतिशतनै तिर्नुपर्ने सो ऐनको प्रावधान पनि मान्य नहुने भन्दै आक्रोश व्यक्त गरेका छन् ।