नागढुंगा–मलेखु सडकखण्ड अन्तर्गत पिप्लामोड तथा धादिङको पोखरेभीर क्षेत्रमा मंसिर २४ गतेदेखि पुस १ गतेसम्म दैनिक दैनिक ५ घण्टा सवारी आवागमन पूर्ण रूपमा बन्द गरिने भएको छ । 

सडक कालोपत्रे तथा स्तरोन्नति कार्य तीव्र रूपमा अघि बढिरहेकाले निर्माण कार्यलाई सहज बनाउन आगामी बुधबारदेखि पाँच दिन दैनिक बिहान साढे १०:३० बजेदेखि अपराह्न साढे ३ बजेसम्म सडक बन्द हुनेछ । अत्यावश्यक सेवाका सवारीसाधन एम्बुलेन्स,सुरक्षा निकाय,दमकल,शव वाहनलाई भने सहजीकरण गरिने ट्राफिक प्रहरीले जनाएको छ ।  सो अवधिमा वैकल्पिक मार्ग प्रयोग गर्न सकिने सवारी साधनहरूलाई आवश्यक परेमा ती मार्ग अपनाउन समेत अनुरोध गरेको छ । पिप्लामोड क्षेत्रमा काठमाडौँबाट नौबिसेतर्फ जाने सवारीहरू नागढुंगा चेकपोस्टमा रोकिने छन्, भने नौबिसेबाट काठमाडौँ फर्कने सवारी नौबिसे र खानीखोलामा रोकिने सुविधा मिलाइएको छ । पोखरेभीर क्षेत्रमा नौबिसेबाट मलेखुतर्फ जाने सवारी गल्छी–बैरेनीमा रोकिनेछन् । त्यस्तै, मलेखुबाट नौबिसेतर्फ आउने सवारी मलेखुमै रोकिने नागढुंगा–मुग्लिन सडक योजना (पूर्वी खण्ड)ले जनाएको छ । सडक बन्द अवधिमा साना र मझौला सवारीका लागि सीतापाईला–रामकोट–भिमढुंगा–धार्के सडक, साथै सामाखुसी–टोखा–छहरे–त्रिशूली–गल्छी हुँदै जरेखेत–त्रिशूली पुल तरेर घाटबेसी सम्म पुग्ने वैकल्पिक मार्ग प्रयोग गर्न जिल्ला प्रशासन कार्यालय धादिङले आग्रह गरेको छ ।

सम्बन्धित निकायले यात्रुलाई यात्रा योजना बनाउँदा तोकिएको समयतालिकालाई ध्यान दिन,आवश्यक जानकारीका लागि स्थानीय प्रशासन तथा ट्राफिक प्रहरीसँग समन्वय गर्न आग्रह गरेको छ र चालक तथा यात्रु सबैलाई आवश्यक निर्देशन पालना गर्न अनुरोध गरेको छ ।