दशौं धादिङ महोत्सव–२०८२ अन्तर्गत धादिङ उद्योग वाणिज्य संघका सम्पूर्ण सदस्यहरूले आज माघ १८ गतेदेखि २२ गतेसम्म संघमा आवद्ध व्यवसायी सदस्यहरूलाई परिचयपत्रकै आधारमा निशुल्क प्रवेशको व्यवस्था गरिने भएको छ ।

धादिङ उद्योग वाणिज्य संघमा २१ सय भन्दा बढी व्यवसायी सदस्यता प्राप्त गरिसकेका छन् । संघमा आवद्ध सदस्यहरूको सक्रिय सहभागिता र उत्साह बढाउने उद्देश्यले यो व्यवस्था गरिएको हो । निःशुल्क प्रवेशका लागि उद्योग वाणिज्य संघद्वारा जारी गरिएको सदस्यता परिचयपत्र वा दर्ता नम्बर देखाउनुपर्ने व्यवस्था गरिएको छ ।उद्योग वाणिज्य संघका पदाधिकारीहरूले यस सुविधाले व्यवसायीहरूलाई महोत्सवसँग थप नजिक बनाउने र स्थानीय उत्पादन तथा उद्योगको प्रवर्द्धनमा सहयोग पुग्ने विश्वास व्यक्त गर्दै संघका व्यवसायीहरूलाई मात्र निःशुल्क प्रवेश सुविधा उपलब्ध हुने धादिङ उद्योग वाणिज्य संघका महासचिव तिलक सिंखडाले जानकारी दिए ।  

“धादिङको दीगो विकास र अर्थतन्त्रको आधार, कृषि, पर्यटन, जलस्रोत तथा उद्योगको पूर्वाधार” भन्ने मूल नाराका साथ सञ्चालन भइरहेको महोत्सवमा स्थानीय उत्पादन, कृषि प्रदर्शनी, औद्योगिक स्टल, पर्यटन प्रवर्द्धनका सामग्री, सांस्कृतिक कार्यक्रम तथा विभिन्न मनोरञ्जनात्मक गतिविधिहरू समेटिएका छन् ।

दशौं धादिङ महोत्सव धादिङबेसीको खुल्ला मञ्चमा सञ्चालन भइरहेको छ र महोत्सव स्थलमा १५८ वटा स्टल राखिएका छन्, जहाँ स्थानीय परिकार, कृषि उत्पादन, घरेलु तथा साना उद्योगका सामग्री, औद्योगिक प्रदर्शनी, बाल उद्यान तथा सूचना प्रविधिसम्बन्धी सामग्रीहरू राखिएको छ ।