बागमती प्रदेश स्तरीय प्याब्सन लोक नृत्य प्रतियोगिता धादिङबेसीमा भव्य रूपमा सम्पन्न भएको छ ।

नेपाली कला, संस्कृति र मौलिक लोक परम्पराको संरक्षण तथा नयाँ पुस्तामा पुस्तान्तरण गर्ने उद्देश्यले आयोजित प्रतियोगितामा प्रदेशका ८ जिल्लाबाट सहभागी २३ वटा उत्कृष्ट विद्यालयहरूबीच कडा प्रतिस्पर्धा भएको थियो ।नेपाली कला, संस्कृति तथा मौलिक लोक नृत्यको संरक्षण र प्रवर्द्धन गर्ने उद्देश्यले आयोजना गरिएको प्रतियोगितामा सहभागी विद्यार्थीहरूले विभिन्न जातजाति र समुदायका सांस्कृतिक पहिचान झल्किने लोक नृत्य प्रस्तुत गरेका थिए । यस्ता कार्यक्रमहरूले नेपाली मौलिक संस्कृतिको संरक्षण र प्रवर्द्धनमा  नेपाली मौलिक संस्कृतिको विविधता उजागर गरेका थिए ।

प्रतियोगितामा काठमाडौँस्थित ईलेन मेमोरियल स्कुल ले उत्कृष्ट प्रस्तुति दिँदै प्रथम स्थान हासिल गरेको छ । विजेता विद्यालयले नगद १५ हजार रुपैयाँसहित सिल्ड तथा मेडल प्राप्त गरेको आयोजकले जनाएको छ । त्यस्तै, प्राइभेट प्याराडाइस सेकेन्डरी स्कुल द्वितीय हुँदै नगद १२ हजारसहित सिल्ड/मेडल प्राप्त गर्न सफल भयो भने आयोजक जिल्लाकै एड्भान्स एकेडेमी ले तृतीय स्थान हासिल गर्दै नगद १० हजारसहित सिल्ड/मेडल हात पार्‍यो । प्रतियोगितामा उत्कृष्ट प्रदर्शन गर्दै सान्त्वना पुरस्कार प्राप्त गर्ने विद्यालयहरूमा सक्सेस एकेडेमी, चिल्ड्रेन पार्क, त्रिस्टार एकेडेमी, लिन इन्टरनेसनल र मित्र सी पाठशाला रहेका छन् ।

कार्यक्रम बागमती प्रदेश प्याब्सन अध्यक्ष मुरारी प्रकाश सन्जेलको अध्यक्षतामा सम्पन्न भएको थियो भने प्रमुख अतिथिका रूपमा केन्द्रीय प्याब्सनका उपाध्यक्ष किशोर गौतम रहेकाे थियो । कार्यक्रममा प्रदेश, केन्द्र तथा जिल्ला कार्यसमितिका पदाधिकारी, सदस्यहरू तथा शिक्षा क्षेत्रसँग सम्बन्धित व्यक्तित्वहरूको उल्लेखनीय उपस्थिति रहेको थियो।