राजनीतिमा पुस्तान्तरण र एजेन्डाको बहस चर्किँदै गइरहेका बेला धादिङ क्षेत्र नं. २ मा नेपाली कांग्रेसका प्रतिनिधि सभा सदस्य उम्मेदवार रमेशप्रसाद धमला स्पष्ट भिजन र प्रतिबद्धतासहित चुनावी मैदानमा उत्रिनुभएको छ ।

“म भाषणभन्दा बढी परिणाम दिने राजनीतिमा विश्वास गर्छु,” भन्ने अभिव्यक्तिलाई मूल सन्देश बनाउँदै उहाँले सार्वजनिक गर्नुभएको प्रतिबद्धता–पत्र धादिङको भूगोल, आवश्यकता र जनचाहनालाई समेटिएको विकासको मार्गचित्रका रूपमा प्रस्तुत गरिएको छ ।

युवा र ‘जेन–जी’ लक्षित योजना: स्वदेशमै अवसर

युवापुस्ताको आकांक्षा र रोजगारीलाई केन्द्रमा राख्दै धमलाले स्टार्टअप सहायता कोष स्थापना, परियोजना धितोमा सहुलियत ऋण सुविधा तथा वैदेशिक रोजगारीबाट फर्किएका युवाका लागि ‘रिटर्नी आप्रवासीमैत्री’ वातावरण निर्माण गर्ने योजना अघि सार्नुभएको छ।
उहाँको उद्देश्य स्पष्ट छ—स्वदेशमै रोजगारी र उद्यमशीलताको आधार तयार पार्ने।

बुढीगण्डकीदेखि पदमार्गसम्म: पूर्वाधारमा प्राथमिकता

धादिङको बहुचर्चित बुढीगण्डकी जलविद्युत आयोजना तत्काल अघि बढाउने र मुआब्जा समस्या समाधान गर्ने प्रतिबद्धता घोषणापत्रको मुख्य एजेन्डा बनेको छ।

यसका साथै:
    •    धादिङबेँसी–तिप्लिङ–सोमदाङ सडक कालोपत्रे
    •    सबै पालिका जोड्ने पक्की सडक
    •    थोपलखोला र आँखुखोलामा मोटरेबल पुल
    •    गाउँ–गाउँमा उच्च गतिको इन्टरनेट

जस्ता योजनाहरू पनि प्राथमिकतामा राखिएका छन् ।

स्वास्थ्य र शिक्षा: गुणस्तरमा जोड

घोषणापत्रअनुसार धादिङ अस्पताललाई १०० शैय्याको विशेषज्ञ अस्पतालमा स्तरोन्नति गर्ने, सल्यानटार अस्पताललाई ५० शैय्यामा विस्तार गर्ने तथा “एक घर–एक धारा” अभियानमार्फत खानेपानी पहुँच विस्तार गर्ने योजना छ।
दीर्घरोगीका लागि निःशुल्क उपचार व्यवस्था र शिक्षातर्फ ‘इन्नोभेशन ल्याब’, प्राविधिक शिक्षा विस्तार तथा प्रदेशस्तरीय क्रिकेट रंगशाला निर्माणको योजना पनि अघि सारिएको छ।

रुवीभ्याली केन्द्रित पर्यटन दृष्टिकोण

रुवी भ्याली र गणेश हिमाल क्षेत्रलाई अन्तर्राष्ट्रिय पर्यटन हबका रूपमा विकास गर्ने लक्ष्यसहित अन्तर्राष्ट्रिय माउन्टेनियरिङ स्कुल स्थापना गर्ने योजना सार्वजनिक गरिएको छ।
“एक गाउँ–एक उत्पादन” अवधारणाअन्तर्गत कफी, अदुवा र मह उत्पादन तथा निर्यात प्रवर्द्धनमार्फत स्थानीय आयस्तर वृद्धि गर्ने रणनीति पनि घोषणापत्रमा समेटिएको छ ।

सामाजिक न्याय र सुशासन

घोषणापत्रमा भ्रष्टाचार नियन्त्रण, पारदर्शिता प्रवर्द्धन, गुठीपीडित समस्या समाधान, द्वन्द्वपीडित तथा शहीद परिवारका लागि विशेष सहायताजस्ता विषयलाई प्राथमिकतामा राखिएको छ।
“बदलिएको कांग्रेसमार्फत काम र परिणाममा आधारित राजनीति गर्न मेरो उम्मेदवारी हो,” धमलाले बताउनुभएको छ ।

घोषणापत्रका ९ मुख्य क्षेत्र

१. युवा, रोजगारी र उद्यमशीलता
२. पूर्वाधार विकास (बाटो, पुल, बिजुली, सूचना प्रविधि)
३. स्वास्थ्य, खानेपानी र सरसफाइ
४. शिक्षा तथा खेलकुद
५. कृषि, उद्योग र आर्थिक विकास
६. पर्यटन र सांस्कृतिक पहिचान
७. सामाजिक न्याय र समावेशिता
८. सुशासन र पारदर्शिता
९. लोकतान्त्रिक प्रतिबद्धता

अब निर्णय धादिङ–२ का मतदाताको हातमा छ— परिणाममुखी राजनीतिलाई अनुमोदन गर्ने कि पुरानै शैलीलाई निरन्तरता दिने? आगामी निर्वाचनले यसको जवाफ दिनेछ।