कारागार कार्यालय धादिङमा स्थापना गरिएको अस्थायी मतदान केन्द्रमार्फत कैदीबन्दी तथा कर्मचारीहरूले आफ्नो मताधिकार प्रयोग गरेका छन् ।

धादिङ कारागारमा हाल २ सयभन्दा बढी कैदीबन्दी रहेका छन् । उनीहरूलाई मतदानको अधिकार सुनिश्चित गर्न कारागार परिसरमै अस्थायी मतदान केन्द्र स्थापना गरिएको थियो । उक्त केन्द्रबाट कुल ९६ जनाले मतदान गरेका छन् भने सिफारिस प्रक्रियामा भएको त्रुटिका कारण केही कैदीबन्दी र कर्मचारी मतदानबाट वञ्चित भएका छन् । मतदान अधिकृत टेकप्रसाद कँडुवालका अनुसार कारागारभित्र रहेका कैदीबन्दीमध्ये ७१ जनाले मतदान गरेका छन्, जसमध्ये ६८ जना पुरुष र ३ जना महिला रहेका छन् । यद्यपि मतदाता नामावली सिफारिस प्रक्रियामा नाम छुटेका कारण ५ जना कैदीबन्दी मतदान गर्नबाट वञ्चित भएका छन् ।

मतदाता परिचयपत्र र मतदाता नामावलीमा नाम भए पनि सिफारिस सूचीमा समावेश नभएपछि उनीहरूले मतदान गर्न नपाएको भन्दै असन्तुष्टि व्यक्त गरेका छन् । उनीहरूका अनुसार आवश्यक कागजात हुँदाहुँदै पनि प्रशासनिक प्रक्रियाको त्रुटिका कारण मतदान गर्ने अवसर गुमाउनुपरेको हो ।

उक्त केन्द्रमा कैदीबन्दीका अतिरिक्त प्रमुख जिल्ला अधिकारी विजयराज सुवेदी सहित २५ जना कर्मचारीले पनि मतदान गरेका छन् । यससँगै कारागार परिसरभित्र कुल ९६ मत खसेको मतदान अधिकृत कँडुवालले जानकारी दिनुभयो ।

तर कर्मचारीतर्फ पनि सिफारिस प्रक्रियामा केही त्रुटि देखिएको छ । जिल्ला प्रहरी कार्यालय धादिङका प्रहरी उपरीक्षक सुमित खड्कासहित केही कर्मचारीले नाम छुटेका कारण मतदान गर्न नपाएको गुनासो गरेका छन् । मतदानका लागि कारागार पुगेका उनीहरू अन्ततः मताधिकार प्रयोग गर्न नपाएपछि निराश बनेका थिए ।