आज र भोलि देशका विभिन्न स्थानमा ठूलो वर्षा, हिमपात तथा तीव्र हावाहुरीको सम्भावना रहेकाले सतर्क रहन मौसमविद्हरूले आग्रह गरेका छन् ।

प्रि–मनसुनको समय भएकाले दिउँसोपछि देशका अधिकांश स्थानमा अचानक हावाहुरी चल्न सक्ने भन्दै महाशाखाले भोलिसम्म विराटनगर, धनकुटा र धरान आसपासका क्षेत्रमा अधिकतम ११९ किलोमिटर प्रतिघण्टासम्मको तीव्र हुरी चल्न सक्ने जनाएको छ । मौसम पूर्वानुमान महाशाखाका अनुसार कर्णाली र सुदूरपश्चिम प्रदेशका पहाडी तथा हिमाली क्षेत्रमा भारी वर्षा र हिमपातको सम्भावना रहेको छ । त्यस्तै दाङ, नेपालगञ्ज लगायत लुम्बिनी प्रदेशका तराई क्षेत्रमा तीव्र गतिमा हुरी चल्ने अनुमान गरिएको छ ।

प्राधिकरणले प्रभावित क्षेत्रका बासिन्दा तथा यात्रुलाई अनावश्यक यात्रा नगर्न, हावाहुरीका बेला घरभित्रै सुरक्षित बस्न र सवारी साधन नचलाउन अनुरोध गरेको छ । साथै ग्यास तथा विद्युत् उपकरण प्रयोगमा विशेष सावधानी अपनाउन र कमजोर संरचना तथा विद्युत् तारबाट टाढा रहनसमेत आग्रह गरिएको छ ।हावाहुरीका कारण रुख ढल्ने, कमजोर संरचना भत्किने तथा विद्युत् र सञ्चार सेवा प्रभावित हुने जोखिम रहेकाले सावधानी अपनाउन राष्ट्रिय विपद् जोखिम न्यूनीकरण तथा व्यवस्थापन प्राधिकरणले आग्रह गरेको छ ।

यसैबीच कोशी र सुदूरपश्चिम प्रदेशका केही स्थानमा गएरातिदेखि नै हल्का वर्षा भइरहेको छ। धेरै स्थानमा मेघगर्जन, चट्याङ र असिनासहित वर्षा तथा हिमपातको सम्भावना रहेको महाशाखाले जनाएको छ ।