नेपाल उद्योग वाणिज्य महासंघ बागमती प्रदेशको कोषाध्यक्ष पदमा धादिङ उद्योग वाणिज्य संघका पूर्व अध्यक्ष रुद्रबहादुर खत्री विजयी भएका छन् ।

२०८२ साल चैत २३ र २४ गते हेटौंडामा सम्पन्न ६०औँ वार्षिक साधारणसभा तथा निर्वाचन–२०८२ अन्तर्गत भएको मतदानमा खत्रीले आफ्ना प्रतिस्पर्धी जीवनकाजी मकजु श्रेष्ठलाई पराजित गर्दै सफलता हात पारेका हुन् । निर्वाचन परिणामअनुसार बेदबहादुर श्रेष्ठ समूहबाट उम्मेदवार बनेका खत्रीले कुल १३२ मत प्राप्त गरेका थिए । उनका प्रतिद्वन्द्वी दुर्गाराज समूहबाट उम्मेदवार बनेका जीवनकाजी मकजु श्रेष्ठले ८२ मत प्राप्त गरे ।  

नवनिर्वाचित कोषाध्यक्ष खत्री धादिङ उद्योग वाणिज्य संघका पूर्व अध्यक्षका रूपमा काम गरिसकेका अनुभवी व्यवसायी हुन् । उनको नेतृत्वमा स्थानीय स्तरमा उद्योग तथा व्यापार प्रवर्द्धनका लागि विभिन्न पहलहरू भएका थिए । यस अनुभवका आधारमा उनले प्रदेश स्तरमा पनि प्रभावकारी वित्तीय व्यवस्थापन र संस्थागत सुदृढीकरणमा योगदान पुर्‍याउने अपेक्षा गरिएको छ ।

उद्योग व्यवसायीहरूको साझा छाता संगठनको रूपमा रहेको नेपाल उद्योग वाणिज्य महासंघको प्रदेश समिति निजी क्षेत्रको आवाज उठाउने महत्वपूर्ण मञ्च मानिन्छ । त्यसैले यस निर्वाचनको नतिजाले प्रदेशको आर्थिक गतिविधि, उद्योग प्रवर्द्धन तथा व्यवसायिक वातावरण सुधारमा सकारात्मक प्रभाव पार्ने विश्वास गरिएको छ ।