प्रधानमन्त्री तथा मन्त्रिपरिषद् कार्यालय ले आइतबार (चैत २९) सार्वजनिक गरेको प्रधानमन्त्री तथा मन्त्रीहरूको सम्पत्ति विवरणले सरकारका शीर्ष पदाधिकारीहरूसँग ठूलो परिमाणमा सुन रहेको तथ्य उजागर गरेको छ ।

सरकारले पारदर्शिता प्रवर्द्धन गर्ने उद्देश्यले हरेक वर्ष सार्वजनिक गर्ने सम्पत्ति विवरणले यसपटक पनि उच्च पदाधिकारीहरूको आर्थिक हैसियतबारे स्पष्ट तस्वीर प्रस्तुत गरेको छ । सार्वजनिक विवरणअनुसार बालेन्द्र शाह नेतृत्वको सरकारका अधिकांश मन्त्रीहरूको सम्पत्तिमा सुनको हिस्सा उल्लेखनीय देखिएको छ । विशेषगरी प्रधानमन्त्री र गृहमन्त्रीको परिवारसँग सुनको परिमाण उच्च रहेको पाइएको छ ।

प्रधानमन्त्री बालेन्द्र शाह का श्रीमतीको नाममा १९० तोला सुन रहेको उल्लेख गरिएको छ, जसको हालको बजार मूल्य करिब ५ करोड ६४ लाख ३० हजार रुपैयाँ बराबर पर्छ । त्यस्तै, गृहमन्त्री सुधन गुरुङ सँग ८९ तोला सुन रहेको छ, जसको मूल्य करिब २ करोड ६४ लाख ३३ हजार रुपैयाँ रहेको विवरणमा उल्लेख छ ।

अर्थमन्त्री डा. स्वर्णिम वाग्ले सँग ४५ तोला (करिब १ करोड ३३ लाख ६५ हजार रुपैयाँ), श्रम मन्त्री रामजी यादव सँग आफ्नै र श्रीमतीको नाममा गरी ५० तोला (करिब १ करोड ४८ लाख ५० हजार रुपैयाँ) सुन रहेको देखिएको छ ।

उद्योग मन्त्री गौरी कुमारी यादव सँग ८० तोला (करिब २ करोड ३७ लाख ६० हजार रुपैयाँ) सुन रहेको विवरणमा उल्लेख छ भने भौतिक पूर्वाधार मन्त्री सुनिल लम्साल सँग ३० तोला (करिब ८९ लाख १० हजार रुपैयाँ) सुन रहेको छ । यसैगरी स्वास्थ्य मन्त्री निशा मेहता सँग ३० तोला, सामान्य प्रशासन मन्त्री प्रतिभा रावल सँग २५ तोला, महिला तथा बालबालिका मन्त्री सिता बादी सँग १८ तोला सुन रहेको देखिएको छ ।

परराष्ट्र मन्त्री शिशिर खनाल सँग २२ तोला, ऊर्जा मन्त्री विराज भक्त श्रेष्ठ सँग १५ तोला, कानुन मन्त्री सोविता गौतम सँग १५ तोला सुन रहेको विवरणमा उल्लेख छ । त्यस्तै, शिक्षा मन्त्री सस्मित पोखरेल का आमाबुबाको नाममा २५ तोला, पर्यटन मन्त्री खडक राज (गनेश) पौडेल सँग ११ तोला, सञ्चार मन्त्री डा. विक्रम तिमिल्सिना सँग ११.५ तोला र कृषि मन्त्री गिता चौधरी सँग ५ तोला सुन रहेको छ ।

सार्वजनिक गरिएको विवरणमा नगद, सुन–चाँदी, सेयर तथा घरजग्गा लगायत सम्पूर्ण सम्पत्तिको विवरण खुलाइएको छ । समग्रमा हेर्दा मन्त्रीहरूको सम्पत्तिमा सुनप्रतिको आकर्षण उच्च देखिएको विश्लेषण गरिएको छ ।