हरेक वर्ष वैशाख कृष्ण पक्ष औँसीका दिन मनाइने “आमाको मुख हेर्ने पर्व” आज देशभर श्रद्धा, भक्ति र सम्मानका साथ मनाइँदैछ ।

यस दिनलाई आमाप्रतिको कृतज्ञता व्यक्त गर्ने विशेष अवसरका रूपमा लिइन्छ । पर्वका अवसरमा छोराछोरीले बिहानै उठेर स्नान गरी आफ्नी आमालाई राम्रा लुगा लगाइदिने, मीठा तथा पोषिला खानेकुरा खुवाउने र आशीर्वाद थाप्ने परम्परा रहेको छ । आमाप्रतिको माया, सम्मान र कृतज्ञता प्रकट गर्ने यो दिन नेपाली समाजमा अत्यन्त भावनात्मक र महत्वपूर्ण मानिन्छ ।

यस अवसरमा मातातिर्थ क्षेत्रमा बिहानैदेखि ठूलो मेला लागेको छ । देशका विभिन्न स्थानबाट श्रद्धालुहरू त्यहाँ पुगेर दिवङ्गत आमाको सम्झनामा स्नान, तर्पण तथा पूजाआजा गरिरहेका छन् । आमा नभएका व्यक्तिहरूले भने यस दिन आफ्नी दिवङ्गत आमाको सम्झनामा तर्पण, पिण्डदान तथा पुरोहितलाई सिदादान सहित भोजन गराउने चलन छ । यसरी उनीहरूले आमाले जीवनभर गरेका त्याग, माया र संघर्षलाई स्मरण गर्दै श्रद्धाञ्जली अर्पण गर्छन् ।

आजको दिनले आमाप्रतिको माया र सम्मानलाई अझ प्रगाढ बनाउँदै पारिवारिक सम्बन्धलाई मजबुत बनाउने सन्देश दिएको छ ।