जिल्ला प्रहरी कार्यालय धादिङले दुर्घटना न्यूनीकरण अभियान अन्तर्गत जिल्लाभित्र सञ्चालन हुँदै आएका बोलेरो गाडीमाथि विशेष निगरानी तथा कारबाही अभियान सञ्चालन गरेको छ ।

प्रहरीका अनुसार जिल्लाको ग्रामीण क्षेत्रमा यात्रु ओसार्ने बोलेरो जिप बढी कारबाही पर्ने गरेका छन् । छतमा राखेर यात्रु ओसारपसार गर्ने, यात्रु बोक्ने अनुमति नभएका सवारीसाधनले जोखिमपूर्ण तरिकाले फलामको हुट जडान गर्ने,क्षमताभन्दा बढी यात्रु राखेर जोखिमपूर्ण ढङ्गले सवारी चलाउने गरेको पाइएकाले नेपाल प्रहरी र ट्राफिक प्रहरीको संयुक्त टोलीले विभिन्न स्थानमा संयुक्त चेकजाँचका क्रममा हालसम्म ३२ वटा सवारी साधनबाट अवैध रूपमा जडान गरिएको फलामको हुट हटाइएको जिल्ला प्रहरी कार्यालय धादिङले जनाएको छ ।

सडक सञ्जाल पुगेपनि जिल्लाको अधिकांश भागमा यात्रुबाहक बस सञ्चालन हुने सडक नभएपछि सर्वसाधारण जोखिमपूर्ण यात्रा गर्न बाध्य छन् ।  सडक सञ्जाल सहज नभएका ग्रामीण बस्तीहरुबाट बोलेरो जिपले सर्वसाधारणलाई सदरमुकाम धादिङबेँसी ल्याउने–लाने गर्छन् । 

प्रहरीले सवारी साधनलाई मापदण्ड विपरीत परिमार्जन नगर्न तथा यात्रुको सुरक्षालाई प्राथमिकता दिन आग्रह गरेको छ । यस्तै, दुर्घटना न्यूनीकरणका लागि यस्तो अभियानलाई निरन्तरता दिइने जिल्ला प्रहरी कार्यालय धादिङले जनाएको छ ।