Gen-Z आन्दोलनका क्रममा मकवानपुरको भीमफेदी कारागारबाट फरार भएका डाँका चोरी मुद्दाका एक प्रतिवादीसहित तीन जनालाई प्रहरीले पक्राउ गरेको छ ।

जिल्ला प्रहरी कार्यालय मकवानपुरबाट फरार कैदी खोजतलास गर्ने क्रममा खटिएको प्रहरी टोलीले धादिङको ज्वालामुखी गाउँपालिका–६ आदमघाट बजारस्थित किराना पसलतर्फ जाँदै गरेको अवस्थामा उनीहरूलाई पक्राउ गरेको हो ।पक्राउ पर्नेमा मकवानपुरको कैलाश गाउँपालिका–६ बस्ने ३३ वर्षीय रुद्र मोक्तान रहेका छन् । उनी डाँका चोरी मुद्दामा भीमफेदी कारागार मकवानपुरमा थुनामा रहेका बेला Gen-Z आन्दोलनका क्रममा कारागारबाट फरार भएका थिए ।

प्रहरीका अनुसार मोक्तानलाई जिल्ला मकवानपुर कैलाश गाउँपालिका–२ बैकुण्ठस्थित बुधराम मोक्तानको घरबाट नगद ६ लाख रुपैयाँ चोरी गरेको घटनामा अनुसन्धान भइरहेको थियो । साथै पक्राउ परेका अन्य दुई जनामा धादिङ बेनिघाट रोराङ गाउँपालिका–९ जोगिमारा बस्ने २२ वर्षीय अशोक तामाङ र १९ वर्षीय उमेश तामाङ रहेका छन् ।

प्रहरीले पक्राउ परेका व्यक्तिहरूलाई आवश्यक अनुसन्धान तथा कानुनी कारबाहीका लागि जिल्ला प्रहरी कार्यालय मकवानपुर पठाइएको जनाएको छ । फरार प्रतिवादी पक्राउ अभियानलाई प्रहरीले निरन्तरता दिएको छ ।