धादिङको त्रिपुरासुन्दरी गाउँपालिका–३ निवासी ४९ वर्षीय सुरेन्द्र वाँडालाई गाउँपालिका कार्यालयमा अभद्र व्यवहार तथा कार्यालयको कामकाजमा अवरोध गरेको आरोपमा प्रहरीले पक्राउ गरेको छ ।

जिल्ला प्रहरी कार्यालय धादिङका अनुसार मिति २०८३ असार ९ गते बिहान करिब १०ः३० बजे वाँडा गाउँपालिकाको कार्यालयमा पुगेर भुक्तानी सम्बन्धी रीत नपुगेको फाइल पेश गर्दै विवाद सिर्जना गरेका थिए । उनले कर्मचारीहरूलाई गालीगलौज, धम्की तथा अभद्र व्यवहार गरेको आरोप लगाइएको छ । प्रहरीका अनुसार केही समयपछि मादक पदार्थ सेवन गरी पुनः कार्यालय परिसरमा पुगेका वाँडाले ताला र चाबी ल्याई गाउँपालिकाको लेखा शाखामा कार्यरत प्रमुख प्रशासकीय अधिकृत र लेखा अधिकृत काम गरिरहेको अवस्थामा बाहिरबाट अनधिकृत रूपमा ताला लगाई कार्यालयको नियमित कामकाजमा अवरोध पुर्‍याएका थिए ।

गाउँपालिका कार्यालयको पत्र जाहेरीका आधारमा प्रहरीले सोही दिन वाँडालाई पक्राउ गरेको जनाएको छ । उनीविरुद्ध अभद्र व्यवहार सम्बन्धी कसूरमा मुद्दा दर्ता गरी थप अनुसन्धान भइरहेको जिल्ला प्रहरी कार्यालय धादिङले जनाएको छ ।