गङ्गाजमुना गाउँपालिका–५, फुलखर्कमा सञ्चालन गरिएको फूलखर्क खानेपानी तथा सरसफाइ आयोजना निर्माण सम्पन्न भएपछि सार्वजनिक सुनुवाइ कार्यक्रम सम्पन्न गरिएको छ ।

शान्ति नेपाल (TSCTP, Dhading) को सहयोगमा सञ्चालित आयोजनाअन्तर्गत आयोजना निर्माण सम्पन्न भएसँगै स्थानीय उपभोक्ता तथा सरोकारवालाको उपस्थितिमा सार्वजनिक सुनुवाइ गरी आयोजनाको प्रगति, लागत तथा आय–व्यय विवरण सार्वजनिक गरिएको हो । आयोजनाबाट ७९ घरधुरीका करिब ५३९ जना प्रत्यक्ष रूपमा लाभान्वित भएका छन् ।

आयोजनाको सम्झौता २०८२ साल कातिॅक १८ गते भएको थियो भने निर्माण कार्य २०८३ साल बैशाख ३० गते सम्पन्न भएको हो । आयोजनाका लागि शान्ति नेपाल,गङ्गाजमुना गाउँपालिका तथा वडा कार्यालय र उपभोक्ता समुदायको श्रमदानसहित अनुमानित रु. २१ लाख ३३ हजार ४४६ लागत रहेकोमा वास्तविक खर्च करिब रु. २० लाख ५४ हजार ८६२ भएको विवरण सार्वजनिक गरिएको छ । आयोजनाअन्तर्गत मुहान संरक्षण, आरसीसी संरचना निर्माण, पाइपलाइन विस्तार तथा घरमा धारा निर्माण गरिएको छ ।  ४ हजार ५ सय ५५ मिटर नयॅा पाइपलाइन बिछ्याइएको छ भने ७७ वटा घरमा धारा निर्माण गरिएको साथै आवश्यक आरसीसी संरचना र अन्य पूर्वाधार निर्माण गरी आयोजनालाई सञ्चालनमा ल्याइएको शान्ति नेपालका परियोजनाका प्रबिधिक अधिकृत चन्द्र तिमल्सिनाले जानकारी दिनु भयो ।

सार्वजनिक सुनुवाइ कार्यक्रममा शान्ति नेपालका परियोजना व्यवस्थापक ईन्द्रमान शाक्यले हामीले खानेपानी आयोजना बनाउने मात्रै होइन, उपभोक्तालाई सुरक्षित र स्वच्छ खानेपानी दिनुपर्छ भन्ने मान्यताअनुरूप पूर्वाधार निर्माणमा गुणस्तरीयता र आयोजनाको सुरक्षालाई ध्यान दिएका छौं घरघरमा नै धारा निर्माण भएपछि महिलाको कार्यबोझ समेत कम हुने भएकोमा खुशी व्यक्त गर्दै पुर्ण सरसफाइमा ध्यान दिन अनुरोध गर्दै व्यक्ति,समाज र सिंगो गाउँपालिकाको आर्थिक, सामाजिक लगायत सर्वपक्षिय सुधार देखिने छ, बताउनु भयो ।

फूलखर्क खानेपानी तथा सरसफाइ उपभोक्ता समितीका अध्यक्ष गोपाल अधिकारीको अध्यक्षतामा सम्पन्न भएको हस्तान्तरण कार्यक्रममा वडा अध्यक्ष राज कुमार गुरुङ,वडा अध्यक्ष प्रेम बहादुर घले,कार्यवाहक वडाध्यक्ष ऋषिश्‍वर अधिकारी र सरोकारवाला निकाय तथा स्थानीय उपभोक्ता सहभागिता रहेको थियो ।