धादिङ प्रहरीले ठूलो परिमाणमा लागूऔषध बरामद गर्दै दुई जनालाई पक्राउ गरेको छ। जिल्ला प्रहरी कार्यालय धादिङका अनुसार विशेष सूचनाको आधारमा गरिएको जाँचका क्रममा ७८ हजार ४ सय क्याप्सुल प्रतिबन्धित लागूऔषध ट्रामाडोल हाइड्रोक्लोराइड (५० एमजी) सहित दुई जनालाई नियन्त्रणमा लिइएको हो ।

प्रहरीका अनुसार वीरगन्जबाट बनेपातर्फ जाँदै गरेको बा.प्र.०३–००१ ख २६८९ नम्बरको यात्रुवाहक बसमा लागुऔषध ओसारपसार भइरहेको विशेष सूचनाका आधारमा प्रहरी चौकी जोगीमाराबाट खटिएको टोलीले उनीहरूलाई पक्राउ गरेको हो । पक्राउ पर्नेहरूमा वीरगन्ज महानगरपालिका– ३ का ४१ वर्षिय मोहनप्रसाद कुर्मी र ३५ वर्षिय प्रतिमा देवी रहेका छन् । उनीहरूको साथबाट लागुऔषधका साथै दुई थान मोबाइलसमेत बरामद गरेको हो ।

बरामद गरिएको लागूऔषध तथा पक्राउ परेका दुवै जनाविरुद्ध लागूऔषध सम्बन्धी कसुरमा जिल्ला अदालत धादिङबाट म्याद थप अनुमति लिई थप अनुसन्धान भइरहेको जिल्ला प्रहरी कार्यालय धादिङले जनाएको छ ।