भोटेकोशी हुँदै त्रिशूली नदीमा आएको विनाशकारी बाढीबाट प्रभावित नागरिकको उद्धार तथा राहतका लागि नेपाल गजल प्रतिष्ठानले आर्थिक सहयोग गरेको छ ।

प्रतिष्ठानले बाढीका कारण ज्यान गुमाएका तथा बेपत्ता भएका नागरिकप्रति श्रद्धाञ्जली व्यक्त गर्दै शोकसन्तप्त परिवारजनमा समवेदना प्रकट गरेको छ । साथै बाढीमा परी बेपत्ता भएकाहरू सकुशल भेटिन सकून् भन्ने कामना गर्दै उद्धार तथा खोजी कार्यमा जुटिरहेकाप्रति सम्मान व्यक्त गरेको छ । बाढीमा परी घाइते भएकाहरूको शीघ्र स्वास्थ्यलाभको कामना गर्दै प्रतिष्ठानले विपद्को समयमा बाढीपीडितको उद्धार तथा राहतका लागि सहयोग पुगोस् भन्ने उद्देश्यले गजलकारहरूको साथ र सहयोगमा रु. १ लाख १३ हजार ३६९ आर्थिक सहयोग संकलन गरी प्रधानमन्त्री राहत कोषमा जम्मा गरेको जनाएको छ ।

यस्तो विपद्को समयमा पीडितका साथमा उभिनु सबैको साझा मानवीय दायित्व र दुःखमा सहारा, विपद्मा सहयोग र पीडामा मल्हम बन्ने सामूहिक प्रयासबाट मात्रै कठिन समय पार गर्न सकिने नेपाल गजल प्रतिष्ठानका अध्यक्ष लालकाजी श्रेष्ठले ओखर न्यूजलाई जनकारी दिनुभयो  ।