भोटेकोशीमा आएको बाढीले धादिङको गजुरी गाउँपालिका–२ स्थित फुर्केखोलाको पक्की पुल बगाएपछि अवरुद्ध बनेको सडक सम्पर्क पुनःस्थापना गर्न ल्याइएको अस्थायी पन्टुन पुल फुर्केखोलामा आइपुगेको छ ।

गत भदौ १० गते आएको भोटेकोशी बाढीले फुर्केखोलाको पक्की पुल बगाएपछि धादिङबेसी र पृथ्वी राजमार्गबीचको सडक सम्पर्क विच्छेद भएको थियो ।  पुल बगेसँगै स्थानीय बासिन्दा, यात्रु तथा मालवाहक सवारीसाधनले लामो र जोखिमपूर्ण वैकल्पिक बाटो प्रयोग गर्नुपरेको थियो ।  एम्बुलेन्ससमेत वैकल्पिक मार्गबाट आवतजावत गर्न बाध्य भएका थिए ।

धादिङका १३ वटै स्थानीय तहका प्रमुख तथा उपप्रमुखहरूको संयुक्त पहल र सहकार्यमा बर्दियाको राजापुर सिँचाइ व्यवस्थापन कार्यालयअन्तर्गत रहेको पन्टुन पुल फुर्केखोलामा ल्याइएको हो । पुल फुर्केखोलामा आइपुगेपछि यसको प्राविधिक अवस्थाबारे स्थलगत निरीक्षणसमेत गरिएको छ ।  ज्वालामुखी गाउँपालिकाका अध्यक्ष यमनाथ दनैका अनुसार अब पुलमा रङरोगन गर्ने काम सुरु गरिनेछ ।  प्राविधिक टोलीको निरीक्षणपछि आवश्यक तयारी पूरा गरी पुल जडानको काम अघि बढाइने उनले जानकारी दिएका छन् । " तिहारलगत्तै पुल सञ्चालनमा ल्याउने लक्ष्यसहित काम अघि बढाइएको छ ।  पुल जडान सम्पन्न भई यातायात सञ्चालनमा आएपछि फुर्केखोलामा पक्की पुल बगेसँगै अवरुद्ध बनेको धादिङबेसी र पृथ्वी राजमार्गबीचको सडक सम्पर्क पुनःस्थापित हुने अपेक्षा गरिएको छ ।"

पन्टुन पुल सञ्चालनमा आएपछि उत्तरी धादिङका स्थानीय बासिन्दा, बिरामी, यात्रु तथा व्यवसायीलाई आवतजावतमा ठूलो राहत पुग्ने विश्वास गरिएको छ । साथै, दैनिक उपभोग्य वस्तु तथा निर्माण सामग्री ढुवानी गर्ने सवारीसाधनलाई समेत सहज हुने अपेक्षा गरिएको छ ।